चंदन तस्करांच्या हल्ल्यानंतर एपीआयने झाडली गोळी

चंदन तस्करांच्या हल्ल्यानंतर गाडगेनगर पोलीस ठाण्यातील एपीआय फिरोज खान पठाण यांनी आरोपीवर गोळी ..

आरोपींचे पलायन : तपोवन परिसरातील संकेत कॉलनीतील घटनाअमरावती : चंदन तस्करांच्या हल्ल्यानंतर गाडगेनगर पोलीस ठाण्यातील एपीआय फिरोज खान पठाण यांनी आरोपीवर गोळी झाडली. ही घटना रविवारी उत्तररात्री २.३० वाजताच्या सुमारास तपोवनजवळील संकेत कॉलनीत घडली. घटनेनंतर आरोपी घटनास्थळावरून पळून जाण्यात यशस्वी झाले. त्यांचा शोध घेण्याकरिता पोलिसांनी मध्यरात्री नाकाबंदी केली होती. गाडगेनगर पोलीस ठाण्यातील एपीआय फिरोज खान पठाण यांचे पथक रविवारी रात्री गस्तीवर होते. दरम्यान एका दुचाकीवरून दोन चंदन तस्कर चंदनाची खोडे घेऊन जात असल्याची माहिती पठाण यांना मिळाली होती. एपीआय पठाण यांनी त्या दुचाकीचा पाठलाग सुरु केला. व्यंकय्यापुऱ्याजवळील महापौर बंगल्याजवळून पोलिसांनी दुचाकीस्वाराचा पाठलाग करून त्यांना तपोवननजीकच्या संकेत कॉलनीजवळ गाठले. चंदनतस्करांच्या दुचाकीला किरकोळ धडक देऊन त्यांना थांबविले असता त्यांच्या दुचाकीवरील चंदनाचे खोड रस्त्यावर पडले. एपीआय पठाण वाहनातून उतरताच दुचाकीवर मागे बसलेल्या आरोपीने कोयता काढून त्यांच्यावर वार केला. मात्र, सावध असलेल्या पठाण यांनी तो वार हुकवला. हुलकावणी देण्याकरिता ते खाली वाकले असतानाच संधी साधून चंदन तस्करांनी दुचाकी घेऊन पळ काढला. त्यामुळे पठाण यांनी तत्काळ सर्व्हीस रिव्हॉल्वरमध्ये गोळ्या भरून चंदन तस्करांवर गोळी झाडली. मात्र, नेम चुकल्याने तस्करांनी हायवेच्या दिशेने पलायन केले. पठाण यांनी तत्काळ या घटनेची सूचना पोलीस उपायुक्त सोमनाथ घार्गे यांना दिली. त्यावेळी घार्गे अन्य भागात गस्त घालत असल्याने ते त्वरित घटनास्थळी पोहोचले. पोलिसांनी लगेच नाकाबंदी करून आरोपींचा शोध घेणे सुरु केले होते. वृत्तलिहेस्तोवर आरोपी पोलिसांच्या हाती लागले नसून यापूर्वीच्या चंदन तस्करांची चौकशी पोलिसांनी सुरु केली आहे. (प्रतिनिधी)२५ हजारांचे चंदन जप्तचंदन तस्करांनी पलायन केल्यावर शहरात नाकाबंदी करण्यात आली होती. दरम्यान महापौर बंगल्यासमोर चंदनाची चार खोडे पडलेली पोलिसांना आढळून आली. घटनास्थळावर आढळलेली आणि महापौर बंगल्यासमोर सापडलेली अंदाजे २५ हजारांंच्या जवळपास चंदनाची खोडे पोलिसांनी जप्त केली आहेत. नाकाबंदीत महाबीजमधील चोराला अटकचंदन तस्करांच्या शोधासाठी पोलिसांनी नाकाबंदी केली होती. दरम्यान महाबीजचे गोदाम फोडून तीन चोरटे कटल्यात बियाण्याच्या १८ बॅग घेऊन जात असल्याचे पोलिसांच्या निदर्शनास आले. कटल्यासह आकाश विठ्ठल पाटील, धनंजय मडावी व अन्य एकाला अटक केली. काही वेळाने आणखी दोन संशयितांना ताब्यात घेतले. अद्याप चंदन चोरीची तक्रार नाहीमहिनाभरापूर्वी चंदन तस्करांनी विभागीय आयुक्त कार्यालयाच्या आवारात, न्यायाधीश बंगला व कांतानगरातील चंदनाची झाडे चोरून नेली. यावेळी पोलिसांनी चंदनाच्या वृक्षांच्या नोंदी घेतल्या होत्या. या परिसरात १५० च्या आसपास चंदनाच्या झाडांची नोंद केली होती, अशी माहिती पोलीस उपायुक्त सोमनाथ घार्गे यांनी दिली. चंदन चोरीचा फंडा वेगळाचचंदनाची चोरी करताना तस्कर कोयता अथवा विळ्याने वृक्षाचा पाच ते सहा फुटाचा आतील गाभा कापतात. खोड काढून तो कापलेला भाग पुन्हा वरवर जोडून ठेवण्यात येते. यामुळे चंदनाची चोरी झाल्याचे लगेच लक्षात येत नाही. मात्र, दोन ते दिवसांनंतर चंदनाचे झाड वाळल्यावर चंदनाचे खोड चोरीला गेल्याचे लक्षात येते. असा विचित्र फंडा चोरटे चंदन चोरीसाठी वापरतात.