बियाणे, खत खरेदीसाठी झुंबड

मशागतीची कामे आटोपली असून, शेतकरी आता पेरणीसाठी सज्ज झाला आहे.

आगर : मशागतीची कामे आटोपली असून, शेतकरी आता पेरणीसाठी सज्ज झाला आहे. शेतकरी बीटी कॉटन, सोयाबीन, उडीद, डीएपी खत, मूग, ज्वारी, तूर व युरिया खरेदीसाठी गर्दी करीत आहे. प्रत्येक पीक घेण्यासाठी विविध प्रकारची खते व औषधींची शेतकर्‍यांना गरज भासत असते. पावसाळा जवळ आला की खतांची खरेदी सुरू होते; परंतु पावसाळ्यापूर्वी खतांची मागणी जास्त असल्यामुळे भाववाढ होते, त्यामुळे शेतकर्‍यांना वाढीव दराचा त्रास सोसावा लागत आहे. पाऊस ७ जूनपासून सुरू होतो; परंतु ९ जूनपर्यंत पाऊस पडलेला नसल्यामुळे शेतकरी चिंतेत आहेत. पेरणीसाठी सज्ज असलेले शेतकरी यंदा पुन्हा नव्या जोमाने कामाला लागले आहेत. हातउसणे करू न शेतकर्‍यांनी महागडी बियाणे खरेदी केली. तर काहींनी उधारीत खरेदी केली. गतवर्षी पावसाने नासधूस केल्यामुळे अपेक्षेप्रमाणे पीक घरात आले नाही. यामुळे शेतकरी आता निसर्गावर पुन्हा विश्वास ठेवून कामाला लागला आहे.