संगमनेर (अहमदनगर) : तमाशा कलावंत रघुवीर खेडकर यांच्या मातोश्री ज्येष्ठ तमाशा कलावंत कांताबाई सातारकर यांचे निधन होण्यापूर्वी पाच दिवस अगोदर त्यांची मोठी मुलगी अनिता ऊर्फ बेबीताई यांचे संगमनेरातील खासगी रुग्णालयात उपचार सुरू असताना निधन झाले होते. त्यानंतर मंगळवारी (दि. ०१) रात्री उशिरा बेबीताई यांचा मुलगा बबलू ऊर्फ अभिजित (वय ३८) यांचे नाशिक येथील खासगी रुग्णालयात उपचार सुरू असताना निधन झाले.
कोरोनाच्या संकटात तमाशा कलावंतांना अनेक अडचणींचा सामना करावा लागत असताना लोककला जिवापाड जपणारे आणि या कलेवर आतोनात प्रेम असलेले तमाशा कलावंत रघुवीर खेडकर यांच्यासह त्यांच्या कुटुंबातील दहा सदस्यांना मे महिन्यात कोरोनाची लागण झाली होती. त्या सर्वांवर संगमनेरातील एका खासगी रुग्णालयात उपचार सुरू असताना त्यातील काही जणांना घरी सोडण्यात आले होते. दरम्यान, कांताबाई सातारकर यांचा कोरोना अहवाल पॉझिटिव्ह आला होता. त्यांच्यावर संगमनेरात घरीच उपचार सुरू असताना वयाच्या ८२व्या वर्षी २५ मे ला कांताबाईंचे निधन झाले होते. कुटुंबातील सर्वच सदस्य उपचार घेत असल्याने बेबीताई यांचा मुलगा बबलू हे सहन करू शकेल का? या सगळ्यांचा विचार करून बेबीताईंच्या निधनाची बातमी जाहीर केली नव्हती. असे खेडकर कुटुंबीयांचे निकटवर्तीय व ज्येष्ठ पत्रकार डॉ. संतोष खेडलेकर यांनी सांगितले. गेल्या आठवड्यात बबलू यांची प्रकृती चिंताजनक झाल्याने त्यांना नाशिकला खासगी रुग्णालयात हलविले होते. मात्र, मंगळवारी रात्री त्यांचे निधन झाले. कांताबाई सातारकरांची मुलगी अनिता त्यानंतर कांताबाई व त्यांचा नातू बबलू या तिघांचे एकामागोमाग निधन झाले. खेडकर कुटुंबावर दुःखाचा डोंगर कोसळला आहे.
-----------
बबलू यांच्या पार्थिवावर संगमनेरात अंत्यसंस्कार
२५ मे ला कांताबाई सातारकर यांचे निधन झाले. त्याआधी पाच दिवस त्यांची मोठी मुलगी अनिता ऊर्फ बेबीताई यांचे उपचारादरम्यान निधन झाले. बेबीताई व कांताबाई सातारकर यांच्या पार्थिवावर संगमनेरातील अमरधाममध्ये अंत्यसंस्कार करण्यात आले होते. बबलूचे पार्थिव नाशिकहून संगमनेरला आणत शहरातील अमरधाममध्ये शोकाकुल वातावरणात अंत्यसंस्कार करण्यात आले. बबलू यांची पत्नी अमृता यांनी अग्निडाग दिला.