केडगाव : नगर तालुक्यातील ५९ ग्रामपंचायतींच्या निवडणुकीसाठी अर्ज दाखल करण्याच्या दुसऱ्या दिवशी (गुरुवारी) ९ गावांतून २६ उमेदवारी अर्ज दाखल झाले. आतापर्यंत एकूण २९ अर्ज दाखल असून, पोखर्डीतून सर्वाधिक ८ अर्ज दाखल झाले आहेत, तर ५० गावांतून अद्याप एकही अर्ज दाखल झाला नाही.
नगर तालुक्यातील ग्रामपंचायत निवडणुकीचे कामकाज नगर तहसील कार्यालयात सुरू आहे. तहसीलदार उमेश पाटील, नायब तहसीलदार अभिजीत बारवकर यांच्या मार्गदर्शनाखाली ३० निवडणूक अधिकारी नेमण्यात आले आहेत. उमेदवारी अर्ज दाखल करण्याचा गुरुवारी दुसरा दिवस होता. गुरुवारी ९ गावांतून एकूण २६ अर्ज दाखल झाले आहेत. आतापर्यंत आलेल्या अर्जांची संख्या २९ झाली आहे. अजूनही बहुतांश इच्छुक कागदपत्रांची माहिती घेणे, जुळवाजुळव करण्यात व्यस्त दिसले. उमेदवारी अर्जासोबत तब्बल १७ प्रकारची कागदपत्रे जोडावी लागत असल्याने इच्छुक उमेदवार याच धावपळीत होते.
................
गावनिहाय उमेदवारी अर्ज
पोखर्डी - ८,
देहरे - ५, इसळक -१, चास -१,
खारेकर्जुने- ७, शिंगवे नाईक - १, शहापूर - १, दश्मी गव्हाण - ४, उदरमल - १.
................
तीन दिवस सलग सुटी
उमेदवारी अर्ज दाखल करण्यास आजपासून सुरुवात झाली असली तरी शुक्रवार, शनिवार व रविवार असे सलग तीन दिवस शासकीय सुटी असल्याने या दिवशी निवडणुकीचे कामकाज बंद राहणार आहे. यामुळे सोमवारनंतरच उमेदवारी अर्ज दाखल करण्यास सुरुवात होणार आहे.
................
कागदपत्रांची क्लिष्टता
ग्रामपंचायत निवडणूक लढविणाऱ्या उमेदवाराला तब्बल १७ प्रकारचे कागदपत्र अर्जासोबत जमा करणे बंधनकारक असल्याने या कागदपत्रांची जमवाजमव करण्यात उमेदवारांची धावपळ होत असून काही कागदपत्रे क्लिष्ट असल्याने इच्छुकांची दमछाक होत आहे.