लहान उद्योगांना वाव न मिळाल्याने बेरोजगारी वाढली!

प्रकाश आंबेडकर यांची कांरजालाड येथील जाहीरसभेत टीका.

कारंजा लाड (वाशिम) : कारंजा-मानोरा मतदार संघाच्या लोकप्रतिनिधींनी लहान उद्योगाकडे दुर्लक्ष केल्यामुळे येथे बेरोजगारांचे प्रमाण वाढले, असे मत भारीप बहुजन महासंघाचे राष्ट्रीय अध्यक्ष अँड. प्रकाश आंबेडकर यांनी येथे ४ ऑक्टोबर रोजी आयोजित जाहीरसभेत व्यक्त केले. भारिप-बहुजन महासंघाच्या उमेदवाराच्या प्रचारार्थ कारंजा येथील विद्याभारती विद्यालयाच्या समोरील कॅ न्सर रिलिफ सेंटरच्या मैदानावर रविवार ५ ऑक्टोबर रोजी दुपारी जाहीर सभेचे आयोजन करण्यात आले होते. सदर जाहीर सभेत उपस्थितांना मार्गदर्शन करताना बाळासाहेब आंबेडकर पुढे म्हणाले, की, विचारात बदल झाला, तर प्रगती होईल. शोषित, पिडीत व शेतकर्‍यांना न्याय देण्यासाठी भारीप बमसंच्या पाठीशी राहा, असेही आंबेडकर म्हणाले. सदर सभेचे प्रास्ताविक मो. युसूफ पुंजानी यांनी, संचालन जिल्हा महासचिव राजाभाऊ चव्हाण यांनी, तर आभारप्रदर्शन अशोक मोहोड यांनी केले.