लोकमत न्यूज नेटवर्क
पुणे : मार्केट यार्डातील गर्दी कमी करण्यासाठी प्रशासनाने कठोर पावले उचलली आहेत. बाजारातील किरकोळ विक्रेते, डमी व लिंबू विक्रेत्यांवर सोमवार (दि.१९) पासून बंदी घातली आहे. रिक्षाला प्रवेश दिला जाणार नाही. तर पास असेल तरच बाजारात प्रवेश दिला जाणार आहे. किरकोळ विक्रीही थांबविली आहे. आडते आणि खरेदीदारांना बाजार समितीकडून पास दिले जातील. प्रवेशद्वारावर ओळखपत्र आणि पास दाखविल्याशिवाय बाजारात प्रवेश दिला जाणार नाही, अशी माहिती बाजार समितीचे प्रशासक मधुकांत गरड यांनी दिली.
मधुकांत गरड म्हणाले की, सहपोलीस आयुक्त रवींद्र शिसवे, अप्पर पोलीस आयुक्त संजय शिंदे, परिमंडळ पाचच्या पोलीस उपायुक्त नम्रता पाटील यांनी बाजाराची पाहणी केली. त्यानंतर झालेल्या बैठकीत गर्दी कमी करण्याच्या दृष्टीने निर्णय घेतले. बाजारात सुमारे दोन हजार डमी विक्रेते आहेत. हे विक्रेते गाळ्यासमोर थांबून विक्री करीत असतात. हे डमी किरकोळ विक्री करीत असल्याने ग्राहकांचीही गर्दी होते. त्यामुळे डमी तसेच लिंबू विक्रेत्यांवर बंदी घातली आहे. आडत्यासह चार पास दिले जाणार आहेत. तसेच खरेदीसाठी येणाऱ्यांनाही पास दिला जाणार आहे. शेतीमाल माल घेऊन येणाऱ्या गाड्यांना एक नंबरच्या प्रवेशद्वारातून प्रवेश दिला जाणार आहे, तर खरेदीदारांच्या गाड्यांना ४ नंबरच्या प्रवेशद्वारातून प्रवेश दिला जाणार असल्याचेही गरड यांनी नमूद केले.
पास असेल तरच वाहनतळावर वाहन लावण्यास परवानगी दिली जाणार आहे. बाजार समितीचे अधिकारी, कर्मचारी, पोलीस आणि वाहतूक पोलीस सयुक्तरीत्या गर्दी कमी करण्यासाठी उपाय-योजना करणार आहेत. बाजारातील गर्दीवर नियंत्रण मिळविण्यासाठी ३० पोलीस कर्मचारी असणार आहेत. नियम मोडणाऱ्यांवर हे पोलीस दंडात्मक कारवाई करणार आहेत. किरकोळ खरेदी करणार्‍यांना प्रवेश दिला जाणार नसल्याने गर्दी कमी होणार आहे. गुळ-भुसार विभागातही शनिवारी तसेच रविवारी माल घेऊन येणाऱ्या गाड्यांना त्या त्या गाळ्यासमोर थांबण्याची परवानगी दिली आहे. मात्र सोमवारी दुपारी १२ नंतर या गाड्यांतील माल उतरवून घेता येणार असल्याचेही मधुकांत गरड यांनी सांगितले.
------
नियम मोडाल तर कारवाई
मार्केट यार्डातील विविध विभागात माल घेऊन येणाऱ्यांची संख्या मोठी आहे. तसेच खरेदी करणाऱ्यांची संख्याही लक्षणीय आहे. त्यामुळे येथे गर्दी होत आहे. ही गर्दी कमी करण्यासाठी प्रभावी उपाययोजना केल्या आहेत. पाळीनुसार पोलिसांच्या नियुक्त्या केल्या आहेत. हे पोलीस बाजारातील परिस्थितीवर लक्ष ठेवून असणार आहेत. सोमवारपासून नियम मोडणाऱ्यांवर कडक कारवाई केली जाईल.
-----
सर्व रस्त्यांवर बॅरिकेड्स
मार्केट यार्डात येणाऱ्या रस्त्यांवर सोमवारपासून बॅरिकेड्स लावणार आहेत. बिबवेवाडी रस्ता, शिवनेरी रस्ता, पोस्ट ऑफिस कार्यालयासह छोट्या रस्त्यांवरही बॅरिकेड्स लावले जाणार आहेत. अन्य रस्त्यांवरून बाजारात येणाऱ्या रस्त्यांवर बंदी घातली आहे. त्यामुळे सोमवारपासून पास असेल, तरच विविध विभागात प्रवेश दिला जाणार आहे. अन्यथा मार्केट यार्डात जाणाऱ्यांना रिकाम्या हातांनी परतावे लागणार आहे.