दारणातून हजारो लिटर पाणी वाया

पाणीटंचाईचे सावट : तातडीने उपाययोजना करण्याची शेतकऱ्यांची मागणी

बेलगाव कुऱ्हे : धरणांचा तालुका म्हणून इगतपुरी तालुका प्रसिद्ध आहे. मराठवाड्याला पाणी पाजणारे ब्रिटिशकालीन दारणा धरणाच्या ५२ गेटमधून गेल्या एक महिन्यापासून गळती लागल्याने हजारो लिटर पाणी दररोज वाया जात असून, खूप मोठे नुकसान होत आहे. तालुक्याच्या पूर्व भागात यावर्षी सरासरीपेक्षा जास्त पर्जन्यमान होऊन दारणा धरण भरले होते; मात्र धरणातून हजारो लिटर वाया जाणाऱ्या पाण्यातून मुख्य जलसाठ्यावर परिणाम होत असल्याने पाणीटंचाईचे सावट निर्माण होण्याची चिन्हे दिसत आहेत. मागच्या वर्षी फेब्रुवारी महिन्यापासून पूर्वभागात दुष्काळी स्थिती निर्माण झाली होती. आताच जर उर्वरित जलसाठ्यामधील पाणी वाहून गेले तर येणाऱ्या परिस्थितीला मोठे तोंड द्यावे लागू शकते. सदर गळती थांबविण्याची मागणी पूर्वभागातील शेतकऱ्यांनी केली आहे. धरणांची निर्मिती झाल्यापासून गेल्या शतकापासून दारणा धरणामधील गाळ काढला नसल्याने त्यातील पाण्याचे घटते प्रमाण चिंताजनक आहे. दरम्यान, धरणांच्या जवळ राहणाऱ्या महिलांना दरवर्षी फेब्रुवारी महिन्यापासून पिण्याच्या पाण्यासाठी दाही दिशा भटकंती करावी लागते.