कळवण येथे ३३ केव्ही उच्चवाहिनीवर स्फोट, एका कुटुंबाचे नुकसान

दुर्घटना : नागरिकांमध्ये भीतीचे वातावरण; घराला तडे; वाहिनी भूमिगत करण्याची मागणी

 कळवण : कळवण शहरातील शिवाजीनगर भागातील सबस्टेशनच्या पाठीमागे असलेल्या नागरी समूह वस्तीत सोमवारी (दि. ९) पहाटे ५ वाजेच्या सुमारास विजेच्या खांबावर मोठा स्फोट झाल्याने खांबालगत असलेल्या घरांना तडे गेले असून, सुदैवाने कुठलीही जीवितहानी झाली नाही. या घटनेने नागरिकांमध्ये प्रचंड घबराट पसरली असून, भीतीचे वातावरण निर्माण झाले आहे.कळवणच्या वीज वितरणच्या सबस्टेशनच्या पाठीमागील परिसरातून ओतूर, नांदुरी, दळवट या ग्रामीण भागातील गावांना वीज उपलब्ध करून देण्यासाठी ३३ केव्हीची उच्चदाब वाहिनी गेलेली आहे. घरांच्या जवळून विद्युतवाहिनी गेलेली असल्याने यापूर्वी येथे दुर्घटना घडल्या आहेत. आज भल्या पहाटे विजेच्या खांबावर स्फोट झाल्याने आगीने रौद्ररूप धारण केले. सुमारे दहा मिनिटे हा ज्वाला सुरू असताना जोरात स्फोट झाल्याने परिसरातील नागरिक या आवाजाने पहाटे झोपेत दचकून जागे होत भीतीने घराबाहेर आले. जवळीलच बापू दामू जाधव यांच्या घराच्या छतावर खांबाची एक वायर तुटून पडल्याने घराच्या छतासह मध्यभागी तडे गेले असून, घरातील वीज मीटरसह सर्व वायरिंग जळून खाक झाली. केवळ नशीब बलवत्तर म्हणून जाधव परिवार यातून बचावला. या घटनेमुळे हालाखीची आर्थिक परिस्थिती असलेल्या जाधव कुटुंबाचे मोठे आर्थिक नुकसान झाले असून, वीज वितरण कंपनीने नुकसानभरपाई मिळावी, अशी मागणी बापू जाधव यांनी केली आहे.महावितरणच्या अधिकाऱ्यांनी दुरुस्ती करून हा प्रश्न मिटणारा नाही. सदर उच्चदाब वाहिनी भूमिगत करावी किंवा शहराच्या बाहेरून न्यावी, अशी मागणी परिसरातील नागरिकांनी केली आहे. (वार्ताहर)