निधी समर्पण समितीतर्फे शहाद्यात मोटारसायकल रॅली

रॅलीचा शुभारंभ दोंडाईचा रस्त्यावरील प्रेस मारुती मंदिरापासून करण्यात आला. प्रारंभी रामभक्तांच्या उपस्थितीत महाआरती करण्यात आली. शेकडो रामभक्तांनी आपल्या मोटारसायकलींना भगवे झेंडे लावलेले होते. जय श्री रामाचा जयघोष करीत रॅली प्रेस मारुती मंदिर, दोंडाईचा रस्ता, बसस्थानक, महात्मा गांधी पुतळा, जुना प्रकाशा रस्ता, गुजर गल्ली, सोनार गल्ली, राम मंदिर, मेन रोड, डोंगरगाव रस्ता, स्वामी समर्थ केंद्र, महाराणा प्रताप चौकमार्गे पुन्हा प्रेस मारुती मंदिर आवारात रॅलीचे विसर्जन करण्यात आले. गोरक्षा समिती, विश्व हिंदू परिषद, बजरंग दल यासह अन्य संघटनांचे पदाधिकारी व कार्यकर्ते रॅलीत सहभागी झाले होते. राजा साळी, गुड्डू पवार, विक्की तांबोळी, सुभाष पाटील, मनीष चौधरी, गणेश धाडक, पप्पू पाटील, पंकज सोनार, अतुल जयस्वाल, दिनेश खंडेलवाल, भाजपचे शहराध्यक्ष विनोद जैन यांनी सहभाग घेतला होता. अयोध्या येथे श्रीराम मंदिर बांधकामासाठी शहरात निधी जमा करण्याचे काम सुरू असून त्यासंदर्भात या मोटारसायकल रॅलीचे आयोजन करण्यात आले होते.