नागपूर : सिलेंडरचा स्फोट झाल्याने आज दुपारी अयोध्यानगरात प्रचंड दहशत निर्माण झाली. दरम्यान या स्फोटामुळे लागलेल्या आगीत एका पाळीव सशाचा होरपळून मृत्यू झाला. आज दुपारी ११.४५ च्या सुमारास अयोध्यानगरातील विजय नारायणराव सरवने यांच्या आऊट हाऊसमध्ये शॉर्ट सर्किटने आग लागली. सिलेंडरचा स्फोट झाल्यामुळे आग तीव्र झाली. या आगीत टीव्ही, फ्रीज, वॉशिंग मशीनसह सुमारे १.७५ लाखांचे घरगुती साहित्य जळून खाक झाले. आऊट हाऊसमध्ये विजय यांनी एक ससा पाळला होता. घटनेच्या वेळी तो पिंजर्यात होता. त्याला बाहेर पडता आले नाही आणि हा बिचारा मुका जीव आगीच्या भक्ष्यस्थानी पडला. सिलेंडरच्या स्फोटामुळे परिसरात प्रचंड दहशत निर्माण झाली होती. माहिती कळताच अग्निशमन दलाचे जवान घटनास्थळी पोहचले. त्यांनी आग विझविण्यात तातडीने यश मिळवले.
अयोध्यानगरात सिलेंडरचा स्फोट
By admin | Updated: May 8, 2014 02:42 IST