महापालिकेत राजकीय सूडनाट्य रंगल

विशेष सभा : महापौरांवर बहिष्काराचा आदेश धुडकावून कॉँग्रेसचे महाडिक समर्थक नगरसेवकांची उपस्थिती; सभेची औपचारिकता पूर्णे

कोल्हापूर : महापौर राजीनामा प्रकरणाचे राजकीय पदर आता खुले होत असून सत्ताधारी कॉँग्रेसमधील महाडिक समर्थक नगरसेवकांनी शुक्रवारी झालेल्या विशेष सभेस उपस्थिती लावल्याने महापालिकेचे राजकारण ढवळून निघाले. सभेला उपस्थित सहापैकी तब्बल चार नगरसेवक कॉँग्रेस-राष्ट्रवादीचे होते. विशेष म्हणजे शिवसेनेच्या नगरसेवकांनी या सभेकडे पाठ फिरवली.नगरसेवक सुनील कदम यांनी विधानसभा निवडणुकीचा मद्दा उचलत थेट कॉँग्रेस नेत्यांवर हल्ला चढवत घरचा आहेर दिला आहे.राज्य शासनाच्या सूचनेनुसार बुधवारी कोरमअभावी तहकूब झालेली ‘विशेष सभा’ आज पुन्हा झाली. १२ वाजून २५ मिनिटांनी सभेला सुरुवात झाली. सभागृहात कॉँग्रेसचे किरण शिराळे, सत्यजित कदम, राजू घोरपडे, राष्ट्रवादी आघाडीला पाठिंबा दिलेल्या अपक्ष माधुरी नकाते, शिवसेना आघाडीचे अपक्ष महेश कदम व भाजपचे आर. डी. पाटील हे नगरसेवक उपस्थित राहिले. भाजपच्या प्रभा टिपुगडे सभागृहात उपस्थिती दर्शवून खासगी कामानिमित्त लगेच निघून गेल्या. सभेसाठी आवश्यक २८ नगरसेवकांची उपस्थिती नसल्याने कोरमअभावी सभा तहकूब करण्यात आली. ही तहकूब सभा पुन्हा १२ वाजून ४५मिनिटांनी पुन्हा घेण्यात आली. महापालिका कायदा कलम १/क नुसार कोरमची गरज नसल्याने सभेची औपचारिकता पूर्ण झाली. सुरुवातीस उपायुक्त विजय खोराटे यांनी सभागृहास सर्वेक्षणाची माहिती दिली. विशेष सभा फक्त सर्वेक्षणाची माहिती देण्यासाठी बोलावली असल्याने आर. डी. पाटील यांची प्रश्नोत्तरे घेण्याची मागणी प्रशासनाने अमान्य केली. यानंतर सभा तहकूब करण्यात आली. सभेची औपचारिकता संपली तरी दिवसभर कवित्व सुरू होते. कॉँग्रेसचे तीन नगरसेवक तर राष्ट्रवादी पुरस्कृत एका नगरसेविकेने बहिष्काराचे आवाहन करूनही उपस्थिती दर्शविल्याने सत्ताधारी नगरसेवकांत चिंतेची लकेर उमटली. उपस्थित नगरसेवकांना पक्षाकडून कारणे दाखवा नोटीस बजावण्यात येणार असल्याचे गटनेत्यांनी स्पष्ट केले.महाडिक समर्थक कॉँग्रेसचे किरण शिराळे व राजू घोरपडे हे दोघे सभा सुरू होण्यापूर्वी पंधरा मिनिटे सभागृहात उपस्थित होते; तर सत्यजित कदम पहिली सभा संपल्यानंतर सभागृहात आले. आमदार महादेवराव महाडिक यांनी उपस्थित राहण्याबाबत परवानगी दिल्यानेच कदम यांनी हजेरी लावल्याची नगरसेवकांत चर्चा होती. माळवींचे ‘पद रद्द’ चा प्रस्ताव पाठवा महापौर तृप्ती माळवी यांच्यावर लाचखोरीचा संशय आहे. पदाचा गैरवापर व अशोभनीय वर्तन केल्याबद्दल महाराष्ट्र महापालिका अधिनियम १९४९ कलम (१)(अ) नुसार राज्य शासनाकडे महपौरांचे नगरसेवकपद रद्द करण्याचा प्रस्ताव पाठवा, या मागणीचे आयुक्त पी. शिवशंकर यांना तब्बल ६० नगरसेवकांच्या सह्याचे निवेदन कॉँग्रेस व राष्ट्रवादीचे गटनेते शारंगधर देशमुख व राजेश लाटकर यांनी दिले. विधितज्ज्ञांचा सल्ला घेऊन योग्य तो अहवाल राज्य शासनास पाठविण्यात येईल, असे आयुक्तांनी नगरसेवकांच्या शिष्टमंडळास आश्वासन दिले. लाचखोरीच्या संशयात अडकल्यानंतर महापौर तृप्ती माळवी यांनी नैतिकता दाखवीत पदावरून दूर होणे गरजेचे होते. त्यामुळे नगरसेवकांनी महापौरांच्या जाहीर व प्रशासकीय कामकाजावर बहिष्कार टाकला आहे. शिवसेनेची अनुपस्थितीमहापौर माळवी यांच्या राजीनाम्यावरून आंदोलन करणाऱ्या शिवसेनेच्या नगरसेवकांनी बुधवारी झालेल्या सभेला मोठ्या संख्येने उपस्थिती दर्शविली होती. मात्र, आजच्या सभेकडे ‘लग्नसराई’ची घाई असल्याच्या कारणास्तव शिवसेनेच्या नगरसेवकांनी पाठ फिरविली. शिवसेनेच्या नगरसेवकांनी सभागृहात अनुपस्थितीत राहावे, यासाठी दोन्ही पक्षांच्या वरिष्ठ नेत्यांमध्ये चर्चा झाली. त्यानंतर शिवसेनेचे नगरसेवक अनुपस्थित राहिले, अशी चर्चा आहे.सभागृहात उपस्थित राहणारच : सत्यजित कदमकाँग्रेसच्या नेत्यांनी विधानसभा निवडणुकीत कसबा बावड्यासह शहरात दुहेरी भूमिका घेतली. त्यावेळी पक्षनिष्ठा कुठे गेली होती, असा सवाल उपस्थित करत नगरसेवक सत्यजित कदम यांनी मनपाच्या सर्व सभांना उपस्थित राहणार असल्याचे ‘लोकमत’ला सांगितले. कदम यांचा ‘घरचा आहेर’ मिळाल्याने सत्ताधारी आघाडीत प्रचंड तणाव निर्माण झाला आहे. महापौर तृप्ती माळवी यांच्या विरोधात काँग्रेस-राष्ट्रवादीने बहिष्काराचे धोरण स्वीकारले आहे तरीही सभागृहात काँग्रेसचे नगरसेवक उपस्थिती दर्शवत आहेत. विधानसभा निवडणुकीत अधिकृत काँग्रेसचा उमेदवार असतानाही माजी गृहराज्यमंत्री सतेज पाटील यांनी शिवसेनेच्या उमेदवारास मदत केली. त्यावेळी नेत्यांची पक्षनिष्ठा कुठे गेली होती. विद्यमान आमदार शहराच्या विकासाकडे दुर्लक्ष करत आहेत, असे त्यांनी स्पष्ट केले.