‘मगो’ची सरकारमध्ये घुसमट!

पणजी : ‘मगो’ पक्षाचे नेते, पदाधिकारी, कार्यकर्ते यांची घुसमट होत आहे. गेली साडेतीन वर्षे आम्हाला हा अनुभव येत आहे. प्रशासनास गतीच नाही व त्यामुळे लोकांची कामे अडतात, असे ‘मगो’ पक्षाचे अध्यक्ष व पार्सेकर सरकारमधील मंत्री दीपक ढवळीकर यांनी बुधवारी ‘लोकमत’ला दिलेल्या खास मुलाखतीवेळी सांगितले. प्रश्नोत्तराच्या रूपात मुलाखत खालीलप्रमाणे, प्रश्न : सरकारमध्ये ‘मगो’ची घुसमट होतेय, असे तुम्हाला वाटते का? त्यामागील कारणे कोणती? उत्तर : घुसमट खूप झाली आहे व होत आहे. आम्ही २०१२ साली भाजपशी युती केली होती, तेव्हा लोकांनी खूप अपेक्षा ठेवल्या होत्या; पण संथ प्रशासनामुळे लोकांची कामे होत नाहीत. मगोच्या कार्यकर्त्यांना विविध महामंडळांवर स्थान दिले जाईल, असेही आम्हाला सांगितले गेले होते; पण तो शब्द पाळला गेला नाही. मनोहर पर्रीकर मुख्यमंत्री होते, तेव्हा ते आम्हा सर्वांना सोबत घेऊन जात होते. विद्यमान मुख्यमंत्री पार्सेकर यांना अजून एक वर्षात काम करून दाखविण्याची संधी आहे. प्रश्न : पुढील निवडणुकीवेळीही तुमची भाजपशी युती होईल का? उत्तर : युतीबाबत अजून काही ठरलेले नाही. आम्ही ‘मगो’ची केंद्रीय समिती, पदाधिकारी, मतदारसंघातील समित्या यांच्याशी चर्चा करू व मग भाजपशी युतीबाबत बोलू. पर्रीकर मुख्यमंत्रिपदी दहा वर्षांसाठी असावेत व त्यांच्यासोबत ‘मगो’ पक्षही असावा, असे आम्हाला २०१२ साली वाटत होते. ‘मगो’-भाजप यांची एक समन्वय समिती असावी व त्या समन्वय समितीच्या सातत्याने बैठका व्हाव्यात, असेही ठरले होते; पण त्याविषयी काही घडले नाही. प्रश्न : सहकार खाते काढल्यानंतर तुम्ही पर्रीकर यांच्याशी बोलणी केली काय? उत्तर : मी पर्रीकर यांच्याशी चर्चा केली नाही; पण माझे सहकार खाते काढताना पर्रीकर यांनी मला एक आश्वासन दिले होते. तुम्हाला आपण २०१४ सालच्या माझ्या (म्हणजे पर्रीकरांच्या) वाढदिनापूर्वी काही तरी महत्त्वाचे देईन; पण पर्रीकर यांनी काही दिले नाही. प्रश्न : तुमची २०१७च्या निवडणुकीवेळी भाजपशी युती झाली नाही, तर ‘मगो’ स्वतंत्रपणे लढण्याएवढा समर्थ आहे? उत्तर : ‘मगो’ने गोव्यावर यापूर्वी १७ वर्षे राज्य केले आहे. तो अनुभव वाया जाणार नाही. तरीही गोव्याचा राज्यकारभार भाजप व ‘मगो’ने नेहमी एकत्रपणे चालवावा, असे आम्हाला वाटते. शेवटी पंतप्रधान मोदी, नितीन गडकरी व मनोहर पर्रीकर हे अंतिम निर्णय घेतील. ‘मगो’ पक्षाचे विविध मतदारसंघांमध्ये काम आहे. प्रश्न : माविन गुदिन्हो यांना दक्षिण गोव्याची पीडीए देण्यास तुमचा आक्षेप होता काय? उत्तर : आमचा त्या वेळीही विरोध होता व आताही विरोध आहे. सरकारने फेरविचार करायला हवा. गुदिन्हो हे काँग्रेसचे आमदार आहेत. त्यांना भाजपने पीडीएचे चेअरमनपद देताना ‘मगो’ पक्षाला विचारलेदेखील नाही. सरकारचा तो निर्णय आम्हाला आवडलेला नाही.