"नियम मोडणाऱ्या सरकारी गाड्यांना चलान लागतं?" शशांकने उपस्थित केला प्रश्न, म्हणाला- "मा. गडकरी साहेबांच्या.."

शशांक केतकरने एक व्हिडीओ शेअर करुन मंत्री नितीन गडकरींचं उदाहरण सर्वांसमोर ठेवलं आहे. काय म्हणाला शशांक?

शशांक केतकर हा मराठी मनोरंजन विश्वातील लोकप्रिय अभिनेता. शशांकला आपण विविध मालिका, सिनेमा आणि नाटकांमधून अभिनय करताना पाहिलंय. शशांक आसपास घडणाऱ्या विविध सामाजिक, राजकीय घटनांवर त्याचं मत व्यक्त करत असतो. शशांक ज्या प्रश्नांवर आवाज उठवतो त्याबद्दल त्याचे चाहतेही चर्चेत असतात. अशातच शशांकने एका नवीन मुद्द्यावर आवाज उठवला आहे. पोलिसांच्या गाड्यांना चलान लागतं का? असा प्रश्न त्याने सर्वांना विचारला असून एक व्हिडीओ शेअर केलाय. 

शशांकने एका पोलीस व्हॅनचा व्हिडीओ शेअर केलाय. हा व्हिडीओ शेअर करुन शशांक लिहितो की, "माझ्या ज्ञानात भर पडावी म्हणून विचारतोय! शासकीय गाड्यांना, police vans ना चलान लागतं का? आणि लागलं तर ते भरलं जातं का? त्यांनी signal मोडला तर चालतं का? माननीय गडकरी साहेबांच्याच गाडीला एकदा चलान भरावं लागल्याचं मी ऐकलं आहे पण सरसकट सगळ्या नियम मोडणाऱ्या सरकारी गाड्यांना चलान लागतं का???"

"जे पोलिस बांधव रस्त्यावर On duty आहेत त्यांच्याच गाडीची ही अवस्था? हे सगळं कुतूहल म्हणून विचारतोय..गैरसमज नसावा. गंमत ही आहे की आपल्याकडे पोलिसांची भीती घातली जाते त्यामुळे जरा जपूनच व्यक्त होतोय. नाईलाज आहे….." अशाप्रकारे शशांकने व्हिडीओ शेअर करत नवीन मुद्द्यावर बोट ठेवलं आहे. शशांकच्या या व्हिडीओचं अनेकांनी समर्थन केलं असून त्यांच्या प्रतिक्रिया व्यक्त केल्या आहेत. शशांक केतकर सध्या 'मुरांबा' या मालिकेत अभिनय करतोय.