शुभमंगल सावधान! किरण-वैष्णवी अडकले लग्नबंधनात; थाटात पार पडला विवाहसोहळा 

'देवमाणूस' या मालिकेच्या माध्यमातून घराघरात पोहोचलेला अभिनेता किरण गायकवाड अखेर विवाहबंधनात अडकला आहे.

Kiran Gaikwad And Vaishnavi Kalyankar Wedding: 'देवमाणूस' या मालिकेच्या माध्यमातून घराघरात पोहोचलेला अभिनेता किरण गायकवाड (Kiran Gaikwad) अखेर विवाहबंधनात अडकला आहे. अभिनेत्री वैष्णवी कल्याणकरसोबत लग्नगाठ बांधून किरणने त्याच्या नव्या आयुष्याला सुरुवात केली आहे. मागील काही दिवसांपासून मराठी मालिकाविश्वात किरणच्या लग्नाची जोरदार चर्चा होती. त्यामुळे त्याचे चाहते सुद्धा उत्सुक होते. अखेर आज १४ डिसेंबरच्या दिवशी लग्नबंधनात अडकून किरण-वैष्णवी साताजन्माचे सोबती झाले आहेत. 

 

नुकताच सोशल मीडियावरकिरण गायकवाड आणि वैष्णवी कल्याणकरच्या लग्नाचा व्हिडीओ समोर आला आहे. मित्र मंडळींच्या उपस्थित मोठ्या थाटात किरण-वैष्णवीचा विवाहसोहळा पार पडला आहे. किरण आणि वैष्णवी त्यांच्या लग्नात फारच सुंदर दिसत आहेत. दोघांनीही लग्नात हटके असा पोषाख निवडला आहे. वैष्णवीने लग्नासाठी जांभळ्या रंगाची नऊवारी नेसली आहे तर किरणने पांढऱ्या रंगाची शेरवानी परिधान केली आहे. किरण वैष्णवीने लग्नगाठ बांधून आयुष्याच्या नव्या वाटेवर पाऊल ठेवलं आहे.

किरण गायकवाड आणि वैष्णवी कल्याणकर यांची पहिली भेट 'देवमाणूस' या मालिकेच्या सेटवर झाली होती. त्यानंतर दोघे एकमेकांच्या प्रेमात पडले. दोघांच्या कामाबद्दल बोलायचं झालं तर, किरण गायकवाडने 'लागिर झालं जी', 'देवमाणूस' या मालिकांबरोबरच अनेक मालिकांमध्ये काम केले. मराठी सिनेमांमध्येही त्याने महत्त्वाच्या भूमिका साकारल्या आहेत. 'चौक', 'फकाट', 'बघतोस काय मुजरा कर' आणि  'डंका हरिनामाचा' या सिनेमांमध्ये तो झळकला आहे. तर वैष्णवी कल्याणकर सुद्धा अभिनेत्री असून तिने 'तू चाल पुढं', 'देवमाणूस २' या मालिकांमध्ये काम केलंय. सध्या ती 'तिकळी' मालिकेत अभिनय करतेय.