७२ व्या वर्षीही तोच उत्साह! महेश कोठारेंचा अनेक वर्षांनी 'चिकी चिकी बुबूम बूम' गाण्यावर डान्स

'सावळ्याची जणू सावली' मालिकेचे ५०० भाग पूर्ण झाल्याने खास पार्टीचं आयोजन करण्यात आलं होतं.

मराठीतील प्रसिद्ध दिग्दर्शक, निर्माते आणि एव्हरग्रीन व्यक्तिमत्व महेश कोठारे. त्यांनी आजवर मराठी सिनेसृष्टीला अनेक हिट सिनेमे दिले. विशेषत: लक्ष्मीकांत बेर्डे, अशोक सराफ यांच्यासोबतचे त्यांनी अनेक सिनेमे केले. त्यांच्या प्रत्येक सिनेमात लक्ष्या तर असायचाच. त्यांच्या मैत्रीची खूप चर्चा व्हायची. महेश कोठारे यांचं कोठारे व्हिजन हे प्रोडक्शन हाऊस आहे. याअंतर्गत सध्या गाजत असलेली मालिका 'सावळ्याची जणू सावली'ने नुकताच ५०० भागांचा टप्पा पूर्ण केला आहे. यानिमित्त आयोजित पार्टीमध्ये महेश कोठारेंनी 'चिकी चिकी बुबूम बूम' या त्यांच्या जुन्या गाण्यावर ठेका धरला.

'सावळ्याची जणू सावली' मालिकेचे ५०० भाग पूर्ण झाल्याने खास पार्टीचं आयोजन करण्यात आलं होतं. मालिकेतील कलाकार, क्रू आणि निर्माते यावेळी एकत्र आले. सर्वांनी मजा मस्ती केली, डान्स केला. निर्माते महेश कोठारेंनी या पार्टीतील काही व्हिडीओ सोशल मीडियावर शेअर केले आहेत. सर्वांनी केक कापत, डान्स करत हे अचिव्हमेंट साजरं केलं आहे.

तर आणखी एका व्हिडीओत महेश कोठारे 'चिकी चिकी बुबूम बूम' या सुपरहिट गाण्यावर नाचताना दिसत आहेत. त्यांचा जोश पाहून इतरही कलाकार त्यांना जॉइन करत आहेत. हे गाणं महेश कोठारेंच्याच 'थरथराट' सिनेमातलं आहे.

महेश कोठारे ७२ वर्षांचे आहेत. याही वयात त्यांचा उत्साह तरुणांनाही लाजवणारा आहे. महेश कोठारेंनी ९० च्या काळात 'झपाटलेला,'धडाकेबाज','थरथराट','धूम धडाका','माझा छकुला,'पछाडलेला','दे दनादन','खबरदार','जबरदस्त' असे अनेक सिनेमे दिले आहेत.