Ikka Teaser: अभिनयातले दोन धुरंधर २९ वर्षांनंतर आमनेसामने! सनी देओल-अक्षय खन्नाच्या 'इक्का'चा टीझर बघाच

Sunny Deol vs Akshaye Khanna: 'बॉर्डर' या ऐतिहासिक चित्रपटानंतर अक्षय खन्ना-सनी देओल ही जोडी तब्बल २९ वर्षांनंतर पुन्हा एकदा पडद्यावर एकत्र दिसणार आहे

बॉलिवूडचे दिग्गज अभिनेते सनी देओल आणि अक्षय खन्ना यांच्या चाहत्यांसाठी एक अत्यंत आनंदाची बातमी समोर आली आहे. १९९७ मध्ये प्रदर्शित झालेल्या 'बॉर्डर' या ऐतिहासिक चित्रपटानंतर ही जोडी तब्बल २९ वर्षांनंतर पुन्हा एकदा पडद्यावर एकत्र दिसणार आहे. नेटफ्लिक्सने त्यांच्या आगामी 'इक्का' (Ikka) या हाय-ऑक्टेन  थ्रिलर चित्रपटाचा 'फर्स्ट लुक' आणि टीझर नुकताच सोशल मीडियावर प्रदर्शित केला आहे.

'इक्का' हा चित्रपट एका उत्कंठावर्धक कोर्टरूम ड्रामावर आधारित आहे. या चित्रपटात सनी देओल एका वकिलाच्या भूमिकेत दिसणार आहे. विशेष म्हणजे, १९९३ मध्ये आलेल्या 'दामिनी' या चित्रपटानंतर सनी देओल पुन्हा एकदा वकिलाच्या भूमिकेत मोठ्या पडद्यावर नव्हे तर थेट ओटीटीवर परतत आहे. या चित्रपटात अक्षय खन्ना एका नकारात्मक आणि आव्हानात्मक भूमिकेत असून तो सनी देओलला जोरदार टक्कर देताना दिसेल.

या चित्रपटाचे कथानक अतिशय रंजक आणि गुंतागुंतीचे आहे. ही कथा एका अशा प्रसिद्ध वकिलाभोवती फिरते, ज्याला एका अशा आरोपीची केस लढण्यासाठी भाग पाडले जाते, ज्याचे करिअर याच वकिलाने एकेकाळी उद्ध्वस्त केलेले असते. कौटुंबिक नातेसंबंध, सूड आणि कायद्याची लढाई अशा त्रिकोणात अडकलेला हा चित्रपट प्रेक्षकांसाठी मनोरंजनाची मोठी मेजवानी ठरणार आहे.

सिद्धार्थ पी. मल्होत्रा यांनी या चित्रपटाचे दिग्दर्शन केले आहे. सिद्धार्थ यांनी यापूर्वी 'महाराज' आणि 'हिचकी' सारख्या यशस्वी चित्रपटांचे दिग्दर्शन केले आहे. या चित्रपटात सनी देओल आणि अक्षय खन्ना यांच्यासोबत दिया मिर्झा, तिलोत्तमा शोम, संजीदा शेख आणि शिशिर शर्मा यांसारख्या तगड्या कलाकारांच्या महत्त्वपूर्ण भूमिका आहेत.

एका दृश्यात सनी देओल अक्षय खन्नाला कानाखाली लगावताना दिसत असून, या सीनमुळे चाहत्यांमध्ये चित्रपटाबद्दलची उत्सुकता अधिकच वाढली आहे. सध्या सनी देओल त्याच्या आगामी 'बॉर्डर २' मुळे चर्चेत आहे, तर अक्षय खन्नाच्या 'धुरंधर' सिनेमातील अभिनयाचे कौतुक केलं गेलं. आता ही जोडी ओटीटीच्या प्लॅटफॉर्मवर काय जादू करते, हे पाहणे औत्सुक्याचे ठरेल. हा चित्रपट लवकरच नेटफ्लिक्सवर प्रदर्शित होणार असून त्याची अधिकृत तारीख अद्याप जाहीर करण्यात आलेली नाही.