कन्नडच्या नगराध्यक्षपदी संतोष कोल्हेंची हॅट्ट्रिक!

कन्नड : नगर परिषद अध्यक्षपदासाठी काँग्रेसचे संतोष कोल्हे यांचे एकमेव नामनिर्देशनपत्र दाखल झाल्याने त्यांची बिनविरोध निवड झाली आहे. तथापि, निवड झाल्याची औपचारिक घोषणा दि. १७ जुलै रोजी करण्यात येईल.नगराध्यक्ष पदासाठी नामनिर्देशनपत्र दाखल करण्याच्या वेळेअखेर संतोष कोल्हे या एकमेव उमेदवाराने सहा नामनिर्देशनपत्रे दाखल केली. दुपारी तीन वाजता प्राप्त नामनिर्देशनपत्रांची छाननी करण्यात आली. छाननीअंती संतोष कोल्हे यांचे नामनिर्देशनपत्र वैध ठरले. त्यामुळे त्यांची बिनविरोध निवड निश्चित झाली. या निवडीमुळे संतोष कोल्हे हे सलग तिसऱ्यांदा नगराध्यक्ष झाले आहेत.पीठासीन अधिकारी म्हणून उपविभागीय अधिकारी राजीव नंदकर, सहायक म्हणून नायब तहसीलदार तथा प्रभारी मुख्याधिकारी डी.बी. निलावाड, तलाठी विकास वाघ यांनी काम पाहिले. बिनविरोध निवड झाल्याबद्दल नगरसेवक व कार्यकर्त्यांनी फटाके फोडून व पेढे वाटून जल्लोष साजरा केला. याप्रसंगी न.प.तील काँग्रेसचे गटनेते वाल्मीक लोखंडे, नगरसेवक सुनील पवार, विक्रम पाटे, साहेबखाँ पठाण, रौफ मामू, कैलास जाधव, नरेंद्र शर्मा, सय्यद सालार, रवी राठोड, तेजपाल जैन, अक्कू पवार, प्रेमसिंग बैनाडे आदींसह कार्यकर्त्यांची उपस्थिती होती. (वार्ताहर)वैजापूरच्या नगराध्यक्षपदी पुन्हा काँग्रेसच्याच शिल्पा परदेशी वैजापूर : वैजापूर नगरपालिकेच्या अध्यक्षपदी काँग्रेसच्या शिल्पा दिनेश परदेशी यांची बिनविरोध निवड झाली. वैजापूर नगरपालिकेच्या अध्यक्ष व उपाध्यक्षपदाची १७ जुलै रोजी निवडणूक होती. ९ व १० जुलै असे दोन दिवस उमेदवारी अर्ज दाखल करण्यासाठी ठेवण्यात आले होते; परंतु या दोन दिवसांत फक्त काँग्रेस-राष्ट्रवादी काँग्रेसच्या शिल्पा परदेशी यांचाच एकमेव उमेदवारी अर्ज नगरपालिकेचे मुख्याधिकारी बी. यू. बिघोत यांच्याकडे प्राप्त झाला. अन्य कोणत्याही राजकीय पक्षांच्या उमेदवारांनी उमेदवारी अर्ज दाखल केला नाही. नगरपालिकेत काँग्रेस-राष्ट्रवादी काँग्रेसचे स्पष्ट बहुमत असल्याने या पदावर त्यांच्याच उमेदवाराची निवड होणार होती. त्यामुळे सेनेने उमेदवारी अर्ज दाखल करण्याचीही तसदी घेतली नाही. काँग्रेस-राष्ट्रवादीकडे १२ जागा आहेत, तर सेनेकडे फक्त ९ जागा आहेत. शिल्पा परदेशी यांच्यासाठी सेना नेत्यांचीही मूकसंमती होती. त्यामुळे शिल्पा परदेशी यांचा मार्ग मोकळा झाला अन् त्यांना या पदावर दुसऱ्यांदा विराजमान होण्याची संधी मिळाली.२०११ मध्ये नगरपालिकेची निवडणूक झाल्यानंतर शिल्पा परदेशी यांच्याच गळ्यात नगराध्यक्षपदाची माळ पडली. त्यावेळी नगराध्यक्ष पद हे इतर मागास प्रवर्गातील महिलेसाठी राखीव होते. परदेशी यांची बिनविरोध निवड झाल्याबद्दल कार्यकर्त्यांनी फटाके फोडून जल्लोष केला. त्यांच्या या निवडीचे माजी नगराध्यक्ष बाळासाहेब संचेती, डॉ. दिनेश परदेशी, राष्ट्रवादी काँग्रेसचे जिल्हा कार्याध्यक्ष भाऊसाहेब पाटील चिकटगावकर, उल्हास ठोंबरे, दशरथ बनकर, लता व्यवहारे, सुनीता जगताप, अफरोज काझी, संगीता गायकवाड, संदीप टेके, सुरेखा धुमाळ, रामदास टेके, मजीद कुरेशी, गोविंद धुमाळ, राजूसिंह राजपूत आदींनी स्वागत केले. आता १७ जुलै रोजी विशेष सभेची औपचारिकता बाकी आहे. या दिवशी उपाध्यक्षपदाची निवड होईल.पैठण : पैठणच्या नगराध्यक्षपदासाठी उमेदवारी दाखल करण्याच्या गुरुवारी शेवटच्या दिवशी ३ नगरसेवकांनी उमेदवारी अर्ज दाखल केले. यात दोन शिवसेना व काँग्रेसच्या एका नगरसेवकाचा समावेश आहे. दि. १७ रोजी नगराध्यक्षपदाच्या निवडीसाठी न.प.च्या सभागृहात विशेष सभा घेण्यात येणार आहे. नगराध्यक्षपदासाठी उमेदवारी दाखल करण्याची आज दुपारी ३ वाजेपर्यंत मुदत होती. दरम्यान, दुपारी १ वाजता शिवसेनेचे दत्ता गोर्डे यांनी नगराध्यक्षपदासाठी ४ उमेदवारी अर्ज दाखल केले, तर विद्यमान उपनगराध्यक्ष जितसिंग करकोटक यांनी २ व शिवसेनेच्या गटनेत्या राखी परदेशी यांनी २ उमेदवारी अर्ज शेवटच्या तासात दाखल केले.राखी परदेशी यांनी दाखल केलेल्या उमेदवारी अर्जावर सूचक व अनुमोदक म्हणून काँग्रेसच्या नगरसेवकांनी सही केली आहे. काँग्रेसचे नगरसेवक सोमनाथ भारतवाले व सुधाकर तुपे हे राखी परदेशी यांचे सूचक व अनुमोदक झाले आहेत. शिवसेनेची उमेदवारी दाखल करणारे नगरसेवक दत्ता गोर्डे यांच्या उमेदवारी अर्जावर भाजपाच्या सुवर्णा रासणे, सेनेच्या मंगल मगर, ललिता पोरवाल यांच्या स्वाक्षऱ्या आहेत, तर विद्यमान उपनगराध्यक्ष जितसिंग करकोटक यांच्या उमेदवारी अर्जावर राजूभाई वीटभट्टीवाले, फाजल टेकडी, इनाम अन्सारी या काँग्रेसच्या नगरसेवकांच्या स्वाक्षऱ्या आहेत. काँग्रेसचे नगरसेवक शिवसेनेच्या उमेदवार राखी परदेशी यांना सूचक अनुमोदक झाल्याने काँग्रेसचे गटनेते अजीम कट्यारे यांनी दु:ख व्यक्त करीत नगरसेवकांनी पक्षनिष्ठा बाळगावी, असे आवाहन केले आहे.नगरसेवक सहलीवरनगराध्यक्षपदाच्या निवडणुकीचे वातावरण चांगलेच तापले आहे. शिवसेना, भाजपा, राष्ट्रवादी काँग्रेस व शहर विकास आघाडीचे बहुसंख्य नगरसेवक शहरातून भूमिगत झाले आहेत. हे नगरसेवक पंढरपूरला दर्शनासाठी गेल्याचे त्यांच्या निकटवर्तीयांकडून सांगण्यात येत असले तरी ते राजकीय सहलीवर गेल्याची शहरभर चर्चा आहे. ४ ते ५ नगरसेवक शहरात आहेत. (वार्ताहर)गंगापुरात दोन अर्ज दाखलगंगापूर : गंगापूरच्या नगराध्यक्षपदासाठी दोन उमेदवारांनी आज उमेदवारी अर्ज दाखल केले. ही निवडणूक १७ तारखेला होत असून यासाठी पीठासीन अधिकारी संजीव जाधवर यांच्या उपस्थितीत काँग्रेसच्या नगरसेविका नंदाबाई अशोक खाजेकर, तर आ. प्रशांत बंब आघाडीतर्फे नगरसेविका नीलम संदीप खाजेकर यांनी दुपारी १ वाजता उमेदवारी अर्ज दाखल केले. गंगापूर नगर परिषदेवर काँग्रेस पक्षाचे वर्चस्व असून गेली अडीच वर्षे संजय जाधव यांनी नगराध्यक्षपद भूषविले. नगर परिषदेतील पक्षीय बलाबल पुढीलप्रमाणे. काँग्रेस ११, शिवसेना ४, आ. बंब आघाडी २, असे एकूण १७ नगरसेवक आहेत.