जिल्हा बँकेसमोर बेशरमचे वृक्षारोपण

बुलडाणा जिल्हा बॅकेच्या चिखली शाखेपुढे स्वाभिमानी शेतकरीसंघटनेचे आंदोलन

चिखली : शेतकर्‍यांची जिव्हाळ्याची जिल्हा सहकारी बँक बुडविण्यास जबाबदार असलेल्या थकीत संचालकांवर कारवाई व्हावी म्हणून वेळोवेळी आंदोलने करूनही अद्यापपर्यंत कोणतीच कारवाई न झाल्यामुळे स्वाभिमानी शेतकरी संघटनेने ३0 मे रोजी येथील जिल्हा बँकेसमोर बेशरमच्या झाडाचे रोपण करून आपला रोष व्यक्त केला. शेतकर्‍यांना पिक कर्जापासून वंचित राहावे लागत असून खाजगी सावकारांचे उंबरठे झिजवावे लागत आहेत. संचालकांवर कारवाई व्हावी म्हणून स्वाभिमानी शेतकरी संघटनेने वेळोवेळी आंदोलने करून शासनाचे लक्ष वेधण्याचा प्रयत्न केला परंतू अद्यापर्यंत कोणत्याच प्रकारची कारवाई झाली नाही. जिल्हा बँकेवर मात्तबर पुढार्‍यांनी दिवसाढवळ्या २0९ कोटी रूपयांचा डल्ला मारला असल्याने शेतकर्‍यांच्या घामाच्या थेंबाथेंबातून उभी राहिलेली जिल्हा बँक कोलमडली त्याच थकीत संचालकांनी अद्याप कर्ज भरणा केल्या नसल्याचा आरोप संघटनेने केला. संचालकांनी शेतकर्‍यांची जिव्हाळ्याच्या बँकेचे कर्ज लवकरात लवकर भरणा करावा अन्यथा त्यांच्या घरासमोरही असेच बेशरमाचे वृक्षारोपण करण्यात येईल, असा ईशाराही यावेळी देण्यात आला.