बाजारात सजावटीसाठी लागणाऱ्या वस्तू उपलब्ध झाल्या असून बाजारपेठ नानाविध वस्तू आणि सजावट साहित्यांनी सजली आहे. कोरोनाच्या महामारीमुळे गणेश उत्सव साजरा करण्यावर बंधने आली आहेत. शासनाने नियमावली जाहीर केली असून यात एक गाव एक गणपती, मिरवणुकीवर बंदी, पूजा करण्यासाठी ५ व्यक्तींना परवानगी देण्यात आली आहे. बाप्पाचे आगमन काही दिवसांवर येऊन ठेपल्याने बाजारपेठेत सजावट संबंधित विविध वस्तू उपलब्ध झाल्या आहेत. सजावटीसाठी लागणाऱ्या विविध रंगाची फुले, पताका, रंगीबेरंगी माळा, बाप्पासाठी लागणारी रंगीबेरंगी मंदिरे, विविध लाईटिंगमाळा, रंगीबेरंगी बल्ब यासारख्या नावीन्यपूर्ण वस्तू बाजारात विक्रीसाठी उपलब्ध झाल्या आहेत. सजावट साहित्य खरेदीसाठी गणेशभक्त गर्दी करताना दिसत आहे. मूर्तिकार गणेशाच्या मूर्तीचे अंतिम टप्प्यातील काम पूर्ण करताना दिसत आहे. काही मूर्तिकारांनी बाप्पाची मूर्ती बाजारात विक्रीसाठी आणलेली दिसत आहे.
.............
यंदा कोरोनाच्या महामारीमुळे गणपती उत्सव साजरा करण्यावर बंधने आली असल्याने बाप्पाच्या मूर्तीची विक्रीसुद्धा कमी झाली आहे. एका गावात एक गणपती असा निर्णय असल्याने गणेश भक्त नाराज असल्याचे दिसत आहे. तुरळक प्रमाणात भक्त बाप्पाची मूर्ती खरेदी करताना दिसत आहे. पहिले बुकिंग करत असायचे पण कोरोनामुळे कोणी बुकिंग करत नाही.
-अनिकेत जाधव, मूर्तिकार, येसगाव
...........................
कोरोनाचा वाढता प्रादुर्भाव लक्षात घेता शासनाने नियम लागू केल्याने एक गाव एक गणपती या आदेशाला आम्ही
पाठिंबा देऊन दिलेले नियम अंमलात आणणार आहोत.
- महेश गायकवाड, गणेश भक्त शिरसगाव
....................................
कोरोना काळाच्या आधी गणेशोत्सव येण्याआधी एक महिना अगोदर दुकानात सजावट साहित्य लावण्याची लगबग सुरू असायची पण यंदा कोरोनाच्या महामारीमुळे बंधने असल्याने कोणीही ग्राहक पहिल्यासारखे खरेदी करताना दिसत नाही. अगदी तुरळक ग्राहक खरेदी करतात.
-नवनाथ भोसले, दुकानदार, शिरसगाव
(०५ शिरसगाव)