Lonavala Local Body Election Result 2025: अनेक वर्षांपासून असलेला भाजपचा बालेकिल्ला ढासळला; लोणावळा नगरपालिकेवर राष्ट्रवादीचा झेंडा

Lonavala Local Body Election Result 2025 राष्ट्रवादीची १६ जागांवर झेप, भाजप ४, शिवसेना १, काँग्रेस ३ जागांवर यश, राजेंद्र सोनवणे यांचा नगराध्यपदासाठी १० हजार ६८१ मतांच्या फरकाने मोठा विजय

लोणावळा : लोणावळा नगरपालिका निवडणुकीत राष्ट्रवादी काँग्रेसचे राजेंद्र सोनवणे यांनी नगराध्यपदासाठी १० हजार ६८१ मतांच्या फरकाने मोठा विजय मिळवला. अनेक वर्षांपासून भाजपचा बालेकिल्ला असलेल्या लोणावळा नगरपालिकेवर राष्ट्रवादीने वर्चस्व प्रस्थापित केले आहे. लोणावळा नगरपालिकेच्या स्थापनेपासून अद्यापपर्यंत लोणावळा नगरपालिकेमध्ये राष्ट्रवादी काँग्रेस पक्षाचे एकही सदस्य गेलेला नाही. आमदार सुनील शेळके यांच्या नेतृत्वाखाली राष्ट्रवादी काँग्रेस अजित पवार पक्षाने नगरपालिकेवर आपला एकहाती झेंडा फडकवला आहे. लोणावळा नगरपालिका निवडणुकीच्या मतदानाचा आज २१ डिसेंबर रोजी निकाल जाहीर करण्यात आला. यामध्ये राष्ट्रवादी काँग्रेस अजित पवार पक्षाच्या १६ जागा, भाजप ४, शिवसेना १, काँग्रेस ३, अपक्ष ३ असे पक्षीय बलाबल लोणावळा नगरपालिकेत निर्माण झाले आहे.

लोणावळ्याच्या माजी नगराध्यक्ष सुरेखा जाधव यांचा पराभव

लोणावळ्याच्या माजी नगराध्यक्ष व लोणावळा शहराची रणरागिणी म्हणून संबोधल्या जाणाऱ्या भाजपच्या सुरेखा जाधव यांचा पराभव झाला आहे. राष्ट्रवादीच्या आरती तिकोने यांनी ४८४ मतांच्या फरकाने त्यांचा पराभव केला, सुरेखा जाधव यांना १,०२६ तर आरती तिकोने यांना १,५१० मते मिळाली.

प्रभाग क्रमांक पाचमधील अटीतटीच्या लढतीमध्ये भाजपचे सुभाष डेनकर विजयी झाले आहेत. या प्रभागात राष्ट्रवादीचे मुकेश परमार आणि भाजपचे सुभाष डेनकर यांच्यात अटीतटीची लढत झाली. मुकेश परमार यांनी सुभाष डेनकर यांच्यात मोठी लढत दिसून येत होती, डेनकर यांच्या उमेदवारी अर्जावर आक्षेप घेतल्याने ही निवडणूक पुढे ढकलण्यात आली होती, परंतु मतदारांनी स्थानिक उमेदवार असलेल्या सुभाष डेनकर यांना विजयाचा कौल दिला.

मागील वीस वर्ष नगरसेवक म्हणून राहिलेले राजू बच्चे यांना पराभवाला सामोरे जावे लागले. राष्ट्रवादीच्या मंगेश मावकर यांनी बच्चे यांचा पराभव केला, तर माजी नगरसेविका रचना सिनकर, ब्रिंदा गणात्रा, सिंधू परदेशी, संजय गायकवाड त्याचबरोबर माजी नगराध्यक्ष सुरेखा जाधव यांची मुलगी अश्विनी जाधव, भाजपचे लोणावळा शहर अध्यक्ष अनंता गायकवाड यांचा मुलगा शैलेश गायकवाड, माजी उपनगराध्यक्ष भरत हरपुडे, माजी नगरसेविका कल्पना आखाडे, माजी नगरसेवक माणिक मराठे अशा दिग्गजांना पराभवाला सामोरे जावे लागले आहे.

नगराध्यक्ष पदाचे प्रथम चार उमेदवार

राजेंद्र बबनराव सोनवणे - राष्ट्रवादी अजित पवार गट - १९,५२९ - विजयी
गिरीश रमेश कांबळे - भाजप - ८८४८

सूर्यकांत विष्णू वाघमारे - शिवसेना - २७७९
राजेंद्र जगन्नाथ दिवेकर - शिवसेना उबाठा - १९२२

विजयी उमेदवार

प्रभाग - विजयी उमेदवार - पक्ष - मते

प्रभाग १ अ - सना राजू चौधरी - शिवसेना उबाठा - १३०६
प्रभाग १ ब - सनी राम दळवी - राष्ट्रवादी अजित पवार गट - १४३६
प्रभाग २ अ - मंगेश दत्तात्रेय मावकर - राष्ट्रवादी अजित पवार गट - १४०१
प्रभाग २ ब - अनिता अंभोरे - राष्ट्रवादी अजित पवार गट - बिनविरोध
प्रभाग ३ अ - श्वेता पाळेकर गायकवाड - राष्ट्रवादी अजित पवार गट - बिनविरोध
प्रभाग ३ ब - लक्ष्मी नारायण पाळेकर - राष्ट्रवादी अजित पवार गट - २०३६
प्रभाग ४ अ - गायत्री धर्मेश रिले - राष्ट्रवादी अजित पवार गट - १२०२
प्रभाग ४ ब - उषा अशोक चौधरी - काँग्रेस - १०७८
प्रभाग ५ अ - वसुंधरा नितीन दुर्गे - राष्ट्रवादी अजित पवार गट - १२३६
प्रभाग ५ ब - सुभाष सुमंत डेनकर - भाजप - १२७२
प्रभाग ६ अ - रेश्मा अर्जुन पाठारे - भाजप - १४६२
प्रभाग ६ ब - दत्तात्रय रामभाऊ येवले - भाजप १५५८
प्रभाग ७ अ - आरती मारुती तिकोणे - राष्ट्रवादी अजित पवार गट - १५१०
प्रभाग ७ ब - देविदास भाऊसाहेब कडू - भाजप - बिनविरोध
प्रभाग ८ अ - सनी पांडुरंग घोणे - राष्ट्रवादी अजित पवार गट - १३७१
प्रभाग ८ ब - दीपा मंगेश आगरवाल - राष्ट्रवादी अजित पवार गट - १६३३
प्रभाग ९ अ - नयना मंगेश पैलकर - राष्ट्रवादी अजित पवार गट - ११२२
प्रभाग ९ ब - मोबीन मोहम्मद इनामदार - अपक्ष - १३९५
प्रभाग १० अ - वैशाली सुनील मोगरे - काँग्रेस - १५२८
प्रभाग १० ब - अनिल महादू गवळी - काँग्रेस - १५८५
प्रभाग ११ अ - भाग्यश्री महादेव जगताप - राष्ट्रवादी अजित पवार गट - १४६८
प्रभाग ११ ब - जीवन प्रकाश गायकवाड - राष्ट्रवादी अजित पवार गट - १५३५
प्रभाग १२ अ - स्वप्ना अतुल कदम - अपक्ष - ११९५
प्रभाग १२ ब - सुमित प्रकाश गवळी - अपक्ष - १६१७
प्रभाग १३ अ - धनंजय वसंत काळोखे - राष्ट्रवादी अजित पवार गट - २६७६
प्रभाग १३ ब - प्रियंका किशोर कोंडे - राष्ट्रवादी अजित पवार गट - २८६२
प्रभाग १३ क - सोनाली संभाजी मराठे - राष्ट्रवादी अजित पवार गट - २७०२