Bigg boss: "हमाली हा शब्द वापरता कामा नये. कारण..."; रोशन भजनकरच्या पत्नीची स्पष्ट प्रतिक्रिया

Bigg boss marathi: अनेकदा या शोमधील रोशन भजनकर याच्या गेमवर, त्याच्या शांत राहण्यावर प्रश्नचिन्ह उपस्थित केले जातात. या सगळ्यावर आता त्याच्या पत्नीने तिचं मत मांडलं आहे.

छोट्या पडद्यावर सध्या गाजत असलेला शो म्हणजे बिग बॉस मराठी (bigg boss marathi). सध्या या शोचा सहावी सीजन सुरु आहे. आतापर्यंत या घरात अनेक राडे, भांडणे झाले आहेत. या सगळ्यातून त्यातील स्पर्धकांचा गेमही दिसून आला. मात्र, अनेकदा या शोमधील रोशन भजनकर याच्या गेमवर, त्याच्या शांत राहण्यावर प्रश्नचिन्ह उपस्थित केले जातात. या सगळ्यावर आता त्याच्या पत्नीने तिचं मत मांडलं आहे.

रोशनची पत्नी सीमा यांनी नुकतीच 'राजश्री मराठी'ला मुलाखत दिली. या मुलाखतीमध्ये तिने रोशनच्या गेम खेळण्याविषयी तिचं मत मांडलं. ''मला त्यांचा खूप अभिमान वाटतो. ते इतक्या दूरपर्यंत ते जातील असं स्वप्नातही वाटलं नव्हतं. काही लोक शिकूनही पुढे जात नाहीत. पण, ते फक्त त्यांच्या मेहनतीच्या जोरावर पुढे गेले'', असं सीमा म्हणाल्या.

पुढे त्या म्हणतात, ''मला असं वाटतं हमाली हा शब्द वापरता कामा नये. कारण, त्यांचं नाव रोशन आहे. मग त्याच नावाने बोलवावं ना. इतरांना कसं त्यांच्या नावावरुन बोलवलं जातं. तसंच यांनाही बोलवावं.खरं तर ताईंनी (राखी सावंत) हा शब्द वापरायला नको होता.ते दहावीत असल्यापासून हमाली करतात. आणि, ही त्यांची मेहनत आहे.''