कॉलेजमधलं प्रेम ते आयुष्यभराची साथ, 'हँडसम हिरो' सचित पाटीलची पत्नी कोण माहितीये का?

सचित पाटीलच्या नुकत्याच रिलीज झालेल्या 'असंभव' सिनेमाशीही त्याच्या पत्नीचं आहे एक कनेक्शन, काय करते सचितची बायको?

अभिनेता, दिग्दर्शक आणि आता निर्माता सचित पाटील सध्या चर्चेत आहे. त्याचा 'असंभव' सिनेमा तुफान गाजतोय. या सिनेमाची पटकथा त्याने लिहिली आहे. शिवाय दिग्दर्शन आणि निर्मितीही केली आहे.

सचित पाटीलने याआधी 'साडे माडे तीन' आणि 'क्षणभर विश्रांती' या सिनेमांचंही दिग्दर्शन केलं होतं. २००३ साली त्याने 'क्यो' या हिंदी सिनेमातून एन्ट्री घेतली. नंतर २०१० साली 'झेंडा' सिनेमातून मराठीत पदार्पण केलं केलं.

पुढे सचित 'क्लासमेट्स','तमाशा लाईव्ह','वन वे तिकीट,'असा मी अशी ती','पैसा पैसा' या काही मराठी सिनेमांमध्ये दिसला.

'राधा प्रेम रंगी रंगिली'ही सचितची गाजलेली मालिका. तर त्याची 'अबोली' ही मालिका ४ वर्ष चालली. काही महिन्यांपूर्वीच मालिकेने निरोप घेतला.

अशा या हँडसम हिरोची पत्नी कोण माहितीये का? सचितने २००९ साली गायिका शिल्पा पै हिच्यासोबत लग्नगाठ बांधली. रुपारेल कॉलेजमध्ये शिकत असताना दोघं प्रेमात पडले होते. त्यांना एक मुलगाही आहे.

शिल्पा पै ही प्रसिद्ध गायिका आहे. तिने सचितच्या 'क्षणभर विश्रांती' सिनेमातही गाणी गायली आहेत. शिवाय भोजपुरी सिनेमांसाठीही तिने आवाज दिला आहे.

सारेगमप, नक्षत्रांचे देणे या कार्यक्रमांमध्ये पूर्वी शिल्पा दिसली आहे. नंतर 'माझा नवरा तुझी बायको'सिनेमात गाण्याची तिला पहिली संधी मिळाली.

सचितच्या आताच रिलीज झालेल्या 'असंभव' सिनेमातील 'सावरताना' हे गाणं खूप गाजतंय. हे गाणं शिल्पानेच गायलं आहे. सचितच्या इतरही सिनेमांतील अनेक गाणी शिल्पानेच गायली आहेत.

बायकोबद्दल सचित एका मुलाखतीत म्हणाला, "मी ज्या मुलीवर प्रेम केलं सुदैवाने तीच माझी बायकोही झाली. शिल्पा पै तिचं नाव आहे. तिने सिनेमात गाणंही गायलं आहे. मी तर अजूनही तिच्या गाण्याच्या प्रेमात आहे जसं तिच्या प्रेमात आहे."

सचित शिल्पा आणि त्यांच्या अनेक फोटो सोशल मीडियावर आहेत. सचित कायमच बायकोवरील प्रेम व्यक्त करताना दिसतो.