आर्थिक संकटात सापडलेल्या निर्मात्याला भरत जाधवने अशी केलेली मदत; मराठी अभिनेत्याने सांगितला जुना किस्सा

आर्थिक संकटात सापडलेल्या निर्मात्याला भरत जाधवने अशी केलेली मदत; काय घडलेलं?

Swapnil Rajshekhar Post:भरत जाधव (Bharat Jadav) हा मराठी सिनेसृष्टीतील एक नावाजलेला अभिनेता आहे. गेली अनेक वर्ष त्यांनी नाटक आणि मराठी चित्रपटांच्या माध्यमातून प्रेक्षकांचं मनोरंजन केलं. जत्रा, बकुळा नावदेव घोटाळे  तसेच क्षणभर विश्रांती, शिक्षणाच्या आईचा घो या चित्रपटांमधील त्यांच्या भूमिका विशेष गाजल्या. त्यानंतर बऱ्याच कालावधीनंतर भरत जाधव त्याचा आगामी चित्रपट आता थांबायचं नाय मधून प्रेक्षकांच्या भेटीला येत आहेत. याच पार्श्वभूमीवर मराठी कलाविश्वातील एका अभिनेत्याने त्यांच्याबद्दलचा जुना किस्सा सोशल मीडियावर पोस्ट शेअर करत सांगितला आहे. 

'तुला शिकवीन चांगलाच धडा' फेम अभिनेते स्वप्नील राजशेखर यांनी सोशल मीडियावर खास पोस्ट शेअर केली आहे. त्या पोस्टद्वारे अभिनेत्याने भरत जाधव यांचा ‘तेंडल्या’ सिनेमादरम्याचा जुना किस्सा शेअर केला आहे. सोशल मीडियावरील या पोस्टमध्ये स्वप्नील यांनी लिहिलंय की, मुद्दा असतो एका सकारात्मक कृतीचा… ती महत्वाची असते…आणि निरपेक्ष भावनेतून केलेली कृती तर अनन्यसाधारण मोठी ठरते आजच्या जगात… ‘तेंडल्या’ नावाचा भन्नाट सिनेमा सचिन जाधव आणि चमुने अत्यंत अनेक वर्षांच्या कष्टाने बनवला.. शेत गहाण ठेवून, गहाणवट शेतीत राबून, त्यातला पैसा सिनेमात लावून सिनेमा गेल्या १० वर्षात मराठी मधे बनलेल्या सर्वोत्तम पाचात येईल ईतका भारी झाला. पण, थिएटरमध्ये त्याचं काही घडलं नाही."

पुढे त्यांनी लिहिलंय, "नेहमीची सगळी कारणं. वितरण न होणे, थिएटर्स न मिळणे, प्रेक्षकांची अनास्था ई.खचून न जाता तेंडल्याच्या मेकर्सनी “तेंडल्या तुमच्या दारी” चळवळ सुरु केली.. गावोगावी शाळा कॉलेजं सोसायटी ई. मधे जाऊन सिनेमा दाखवायचा.या उपक्रमाची सुरुवात करताना जो प्रदर्शन कार्यक्रम झाला त्यासाठी आपला सुपरस्टार भरत जाधव आणि मी गेलो. चांगल्या सिनेमाला एक पाठिंबा म्हणून. भरतला सिनेमा अत्यंत आवडला. मेकर्सची जिद्द भावली. स्वयंप्रेरणेनं त्यानं या उपक्रमाला एक रक्कम प्रदान केली. त्याची वाच्यता कुठेही न करण्याचा अटीवर. रक्कम त्या मेकर्सना आधार देणारी.. त्यापेक्षा भरत जाधव सारखा अभिनेता आपल्या पाठीशी उभा राहतोय ही भावना प्रचंड बळ देणारी". 

मराठी कलांवत मनाने श्रीमंत आहेत...

"त्याच्या या कृतीने सगळेच भारावले. मला व्यक्तिशः वाटलं की ही गोष्ट अनेकांना प्रेरक ठरेल. सध्याच्या नकारात्मक वातावरणामधे अशा सकारात्मक गोष्टींचा दिलासा मिळतो. कुणीतरी अत्यंत निरपेक्ष भावनेने कुणासाठी, विशेषतः नव्या कलावंतासाठी काही करु पाहतंय हे किती आनंददायी आहे. भरतला वारंवार विनंती करुनही तो याची जाहिर वाच्यता न करण्याच्या अटीवर ठाम होता. शेवटी मी हट्टाने त्याच्याकडुन परवानगी न घेता ही गोष्ट लिहितोय,  ती सांगणं महत्वाचं आहे. भरत सारखे अनेक मराठी कलावंत ढिंढोरा न पिटता सर्वतोपरी समाजकार्यासाठी हातभार लावत असतात, हे मी जवळून पाहिलंय. आपली ही बाजू कळू देण्याची त्यांची वृत्ती नसते. पण हे लोकांपर्यंत पोहोचायला हवं, गरजेचं आहे. मराठी कलांवत पैशाने असतील, त्याहून मनाने श्रीमंत आहेत. हे समजायला हवं आपल्याच मायबाप प्रेक्षकांना. भरत love you…". अशी पोस्ट लिहित अभिनेत्याने भरत जाधव यांच्याबद्दल आठवणीतला छानसा किस्सा शेअर केला आहे.