"त्याने खूप कष्ट केलेत, पण...", सचिन पिळगावकरांच्या ट्रोलिंगवर अशोक सराफ यांचं स्पष्ट मत, म्हणाले...

सचिन पिळगावकर हे मराठी सिनेसृष्टीतील लोकप्रिय अभिनेते आहेत. मात्र अनेकदा त्यांना ट्रोलिंगचा सामना करावा लागला आहे. याबाबत आता अभिनेते अशोक सराफ यांनी प्रतिक्रिया दिली आहे. 

सचिन पिळगावकर हे मराठी सिनेसृष्टीतील लोकप्रिय अभिनेते आहेत. अभिनयासोबतच त्यांनी अनेक सिनेमांचं दिग्दर्शनही केलं आहे. केवळ मराठीच नव्हे तर हिंदी विश्वातही त्यांनी नाव कमावलं आहे. खूप कमी वयापासूनच सचिन पिळगावकर यांनी अभिनय करायला सुरुवात केली होती. इतकी वर्ष ते प्रेक्षकांचं अविरत मनोरंजन करत आहेत. मात्र अनेकदा त्यांना ट्रोलिंगचा सामना करावा लागला आहे. याबाबत आता अभिनेते अशोक सराफ यांनी प्रतिक्रिया दिली आहे. 

सचिन पिळगावकरांच्या ट्रोलिंगबाबत 'मुंबई तक'शी बोलताना अशोक सराफ म्हणाले, "निश्चितच वाईट वाटतं. कारण त्याने जे मिळवलंय ते सहजासहजी मिळवलेलं नाहीये. त्यासाठी त्याने कष्ट केलेत. त्याने प्रत्येक गोष्टीचा अभ्यास केला आहे. तरुणपणीच त्याने दिग्दर्शन केलंय. त्याने संगीतसुद्धा दिलंय. त्याला एडिटिंगही येतं. हे सगळे प्रकार तो स्वत: शिकला आहे. तो काय बोलतो त्याच्यावरुन त्याला ट्रोल केलं जातं. त्याच्या ज्ञानावर त्याचं ट्रोलिंग होत नाही. ज्ञानावर ट्रोल करा...एकाला तरी जमेल का? कारण तो काय करतोय किंवा काय नाही, हे त्यांना माहितच नाही. ट्रोलिंग करणं हा एक छंद झाला आहे. ट्रोल करून लोक विसरून जातात. काही जण तर तेच शोधत असतात की हा कुठे काय बोलतोय का किंवा सापडतोय का...". 

दरम्यान, अशोक सराफ आणि सचिन पिळगावकर यांनी ८०-९०च्या दशकात अनेक सिनेमांमध्ये एकत्र काम केलं आहे. अशी ही बनवाबनवी, गंमत जंमत, आयत्या घरात घरोबा, आमच्यासारखे आम्हीच, नवरा माझा नवसाचा अशा अनेक सिनेमांमध्ये ही जोडी एकत्र दिसली.