'धुरंधर'मधल्या या अभिनेत्रीला लूक्सवरुन ऐकावे लागलेले टोमणे, नाक आणि दात बदलण्याचा मिळालेला सल्ला

'धुरंधर' (Dhurandhar) चित्रपटात आयटम साँग करून चर्चेत आलेली अभिनेत्री आयशा खान(Ayesha Khan)ने एक धक्कादायक खुलासा केला आहे. तिने सांगितले की, करिअरच्या सुरुवातीच्या दिवसात तिच्या लूक्सवरून लोकांनी तिला खूप ट्रोल केले होते

रणवीर सिंगचा चित्रपट 'धुरंधर' सध्या थिएटरमध्ये धुमाकूळ घालत आहे. प्रेक्षक आणि समीक्षक दोघेही या चित्रपटाचे कौतुक केल्याशिवाय राहू शकत नाहीत. चित्रपटातील प्रत्येक लहान-सहान गोष्ट प्रेक्षकांना प्रभावित करत आहे. या चित्रपटाची चर्चा केवळ मुख्य कलाकारांपर्यंत मर्यादित नाहीये. सहायक कलाकारांचेही जोरदार कौतुक होत आहे. या दरम्यान, चित्रपटात आयटम नंबर करणाऱ्या अभिनेत्री आयशा खानने तिच्यासोबत घडलेल्या धक्कादायक अनुभवाचा खुलासा केला आहे.

आयशा खानने सांगितले की, सिनेइंडस्ट्रीत नेहमीच 'चांगले दिसण्याचा' दबाव असतो. अनेक वेळा तिच्यावर तिचा लूक बदलण्यासाठी दबाव टाकण्यात आला. कधी तिला दात बदलण्याचा, तर कधी नाक व्यवस्थित करण्यासाठी दबाव टाकण्यात आला होता. इतकंच नाही तर, तिच्या लूक्सबद्दल लोकांनी खूप टोमणे मारले होते. मात्र, तिने स्वतःची वेगळी ओळख जपून ठेवली. आता ती चित्रपटाच्या यशाचा भाग बनून आपल्या कौशल्याने सर्वांची मने जिंकत आहे. आयशा खानने 'गलाटा इंडिया'शी बोलताना सांगितले, "मला आठवतंय की मी एका चित्रपटाच्या कास्टिंग सेशनसाठी गेले होते आणि दिग्दर्शकही तिथे आले होते. ते खूप प्रसिद्ध दिग्दर्शक होते. त्या भेटीबद्दल मी खूप उत्साहित होते आणि तो एक हॉरर चित्रपट होता. त्यांनी मला तिथेच ऑडिशन द्यायला सांगितले आणि मी दिले. ते माझ्या ऑडिशनने खूप खूश झाले."

दिग्दर्शकाचे बोलणं ऐकून अभिनेत्रीला बसला धक्का 
आयशाने सांगितले की, नंतर तिला खात्री देण्यात आली की तिची निवड या प्रोजेक्टसाठी होईल. मात्र, यानंतर लगेचच दिग्दर्शकाने तिच्या रूप-रंगावरून नकारात्मक कमेंट्स करण्यास सुरुवात केली. दिग्दर्शकाचे बोलणे ऐकून तिला धक्का बसला होता. आयशा म्हणाली, "मग ते मला म्हणाले की, 'हा हॉरर चित्रपट आहे, म्हणून ठीक आहे, नाहीतर तुला तुझे दात बदलावे लागले असते.' ते खरंच असं काही बोललं का, याचा विचार करून मी थक्क झाले. याआधी मी खूप खूश होते आणि हसत होते, पण हे ऐकून माझा चेहरा उतरला."

नाकावरूनही केली कमेंट
पुढे तिने सांगितले की, लोक वारंवार तिच्या नाकावर कमेंट करतात. ती म्हणाली, "मला कधीही कोणत्या दिग्दर्शकाने असे म्हटले नाही. नेहमीच एखादा कोऑर्डिनेटर किंवा एखादा अनोळखी व्यक्तीच असे बोलत असे. एकदा तर कोणीतरी मला म्हणाले की, 'तू तुझे नाक ठीक करून घे' आणि ही कशी कमेंट आहे, हे ऐकून मला आश्चर्य वाटले. पहिली गोष्ट म्हणजे, मला माझे नाक खूप आवडते आणि मला वाटते की माझे नाक सुंदर आहे, आणि दुसरी गोष्ट म्हणजे, मी माझे नाक बदलावे असे सांगणारे तुम्ही कोण आहात? हे असे लोक आहेत ज्यांच्याकडे त्यांच्या आयुष्यात करण्यासारखे काही चांगले नाही. हे लोक आणखी काय करणार?"