Stock Market Down: गेल्या काही दिवसांपासून शेअर बाजारात सुरू असलेलं घसरणीचं सत्र आजही सुरू राहिलं. आज शेअर बाजारात मोठी घसरण झाली. शेअर बाजारातील कामकाजाच्या अखेरीस सेन्सेक्स १.२८ टक्क्यांच्या किंवा १०६५ अंकांच्या घसरणीसह ८२,१८०.४७ वर बंद झाला. त्याच वेळी, दुसरीकडे निफ्टीमध्येही मोठी घसरण झाली. ५० शेअर्सचा निफ्टी १.३८ टक्क्यांनी किंवा ३५३ अंकांनी घसरून २५,२३२ वर बंद झाला.
शेअर बाजारात का झाली घसरण?
१. जागतिक बाजारातून नकारात्मक संकेत
अमेरिकेचे राष्ट्राध्यक्ष डोनाल्ड ट्रम्प यांनी आठ युरोपीय देशांवर अतिरिक्त टॅरिफ (कर) लावण्याची धमकी दिली आहे, ज्यामुळे जगभरातील शेअर बाजारांमध्ये अस्थिरता वाढली आहे. ट्रम्प यांनी म्हटलं की, जर अमेरिकेला ग्रीनलँड घेण्याची परवानगी दिली नाही, तर ते डेन्मार्क, नॉर्वे, स्वीडन, फ्रान्स, जर्मनी, नेदरलँड्स, फिनलँड आणि ब्रिटनमधून आयात होणाऱ्या वस्तूंवर १ फेब्रुवारीपासून १०% अतिरिक्त टॅरिफ लावतील. यानंतरही तोडगा निघाला नाही तर १ जूनपासून हा टॅरिफ २५% पर्यंत वाढू शकतो. या विधानानंतर युरोपमध्ये EUROSTOXX 50 आणि DAX फ्युचर्स सुमारे १.१% नी घसरले, तर जपानचा निक्केई (Nikkei) इंडेक्स सुमारे १% पर्यंत खाली आला. अमेरिकन शेअर बाजार 'मार्टिन ल्यूथर किंग ज्युनियर डे' निमित्त सुट्टीमुळे बंद असले तरी, सोमवारी सकाळी अमेरिकन स्टॉक फ्युचर्स ०.७% च्या घसरणीसह व्यवहार करताना दिसले.
२. फेड चेअरमनबाबत अनिश्चितता
अमेरिकन फेडरल रिझर्व्ह बँकेच्या पुढील चेअरमनबाबत असलेल्या अनिश्चिततेमुळे बाजारातील वातावरण बिघडलं आहे. ट्रम्प यांनी म्हटलं की, केविन हॅसेट यांची पुढील चेअरमन म्हणून नियुक्ती केली जाणार नाही; ते व्हाईट हाऊस नॅशनल इकॉनॉमिक कौन्सिलचे संचालक म्हणूनच राहू शकतात. हॅसेट हे व्याजदरात कपात करण्याच्या बाजूनं मानले जातात. त्यांच्या नियुक्तीवरील अनिश्चिततेमुळे २०२६ मध्ये व्याजदर कमी होण्याची आशा धूसर झाली आहे, ज्याचा परिणाम जागतिक शेअर बाजारांवर झाला.
३. परदेशी गुंतवणूकदारांची सततची विक्री
परदेशी संस्थागत गुंतवणूकदारांनी (FII) सलग नवव्या दिवशी भारतीय शेअर बाजारातून पैसे काढून घेतले आहेत. शुक्रवारी त्यांनी भारतीय बाजारात ४,३४६.१३ कोटी रुपयांच्या शेअर्सची विक्री केली. जिओजित फायनान्शिअल सर्व्हिसेसचे मुख्य गुंतवणूक रणनीतीकार व्ही. के. विजयकुमार यांच्या मते, "जानेवारी महिन्यात आतापर्यंत परदेशी गुंतवणूकदारांनी एकूण २२,५२९ कोटी रुपयांची विक्री केली आहे. या वर्षाच्या सुरुवातीलाही भारताची कामगिरी इतर मोठ्या जागतिक शेअर बाजारांच्या तुलनेत कमकुवत राहिली आहे."
४. तिसऱ्या तिमाहीच्या कमकुवत निकालांचा परिणाम
डिसेंबर तिमाहीच्या संमिश्र निकालांमुळे शेअर बाजारावर दबाव वाढला. निफ्टी आयटी इंडेक्स आज व्यवहारादरम्यान सुमारे १% पर्यंत घसरला. विप्रोच्या शेअर्समध्ये सर्वाधिक ९ टक्क्यांपर्यंत घसरण पाहायला मिळाली. बँकिंग शेअर्सवरही दबाव होता; आयसीआयसीआय (ICICI) बँकेचा शेअर सुमारे ३% नं घसरला. बँकेने डिसेंबर तिमाहीत जास्त तरतुदींमुळे बाजार अंदाजापेक्षा कमकुवत कामगिरी केली. मेहता इक्विटीजचे सीनियर व्हीपी (रिसर्च) प्रशांत तापसे यांनी रॉयटर्सला सांगितलं की, "ब्लूचिप कंपन्यांच्या संमिश्र निकालांमुळे बाजार सतर्क झाला आहे. या निकालांमुळे गुंतवणूकदारांचा विश्वास कमी झाला असून निवडक शेअर्समध्ये मर्यादित खरेदी दिसून येत आहे."
५. इंडिया VIX मध्ये मोठी वाढ
शेअर बाजारातील भीती दर्शवणारा 'इंडिया VIX' (India VIX) इंडेक्स सोमवारी ५% पेक्षा जास्त उसळून ११.९८ वर पोहोचला. VIX मधील वाढ हे सहसा संकेत देते की गुंतवणूकदार सध्या सावध झाले आहेत आणि जोखीम पत्करणं टाळत आहेत.