"विजय सेतुपती कोण हे माहीतच नव्हतं...", 'द गांधी टॉक्स'बद्दल बोलताना 'ठरलं तर मग'मधल्या मधूभाऊंचं वक्तव्य

नारायण जाधव यांनी 'द गांधी टॉक्स'मध्ये विजय सेतुपतीसोबत स्क्रीन शेअर केली आहे. नुकत्याच दिलेल्या मुलाखतीत या सिनेमाच्या शूटिंगचा अनुभव त्यांनी सांगितला. त्याबरोबरच विजय सेतुपतीला ओळखतही नव्हतो, असं वक्तव्यदेखील त्यांनी केलं आहे. 

विजय सेतुपतीचा 'द गांधी टॉक्स' हा मुकपट अनेक कारणांमुळे चर्चेत आहे. अलिकडेच ३० जानेवारीला हा सिनेमा प्रदर्शित झाला आहे. या सिनेमात 'ठरलं तर मग'मध्ये मधू भाऊंची भूमिका साकारून घराघरात पोहोचलेले अभिनेते नारायण जाधव यांनीही काम केलं आहे. नारायण जाधव यांनी 'द गांधी टॉक्स'मध्ये विजय सेतुपतीसोबत स्क्रीन शेअर केली आहे. नुकत्याच दिलेल्या मुलाखतीत या सिनेमाच्या शूटिंगचा अनुभव त्यांनी सांगितला. त्याबरोबरच विजय सेतुपतीला ओळखतही नव्हतो, असं वक्तव्यदेखील त्यांनी केलं आहे. 

नारायण जाधव यांनी इट्स मज्जाला मुलाखत दिली. या मुलाखतीत ते म्हणाले, "विजय सेतुपती कोण आहे हे मला माहितच नव्हतं. कारण मी साऊथचे सिनेमे तितके बघत नाही. खरं म्हटलं तर आपण त्या त्रिमुर्तीमध्येच जास्त अडकलेले आहोत. दिलीप कपूर, राज कपूर, देवानंद, शमी कपूर सगळ्यांनीच चांगली कामं केली. जेव्हा मी दुसऱ्या दिवशी शूटिंगसाठी चाळीतील सेटवर गेलो आणि मी विचारलं की विजय सेतुपती कोण आहे? तेव्हा मला त्यांनी असं बोट वर करून दाखवलं. चेक्सचं शर्ट घातलेला साधा माणूस...मी म्हटलं हा स्टार आहे? मी म्हटलं हा खाली उतरला तर याला कोण ओळखणारही नाही. पण नंतर मग त्याचं ग्लॅमर कळायला लागलं". 

'द गांधी टॉक्स' या सिनेमात विजय सेतुपतीसोबत अभिनेत्री अदिती राव हैदरी मुख्य भूमिकेत आहे. या सिनेमात मराठी कलाकारांची फौज आहे. 'द गांधी टॉक्स'मध्ये नारायण जाधव यांच्यासोबत सिद्धार्थ जाधव, प्रियदर्शिनी इंदलकर, महेश मांजरेकर, उषा नाडकर्णी, वनिता खरात, रोहिणी हट्टांगडी यांच्या महत्त्वाच्या भूमिका आहेत.