'बिग बॉस मराठी ६'चा नवा होस्ट कोण ? आज रात्री 'बिग बॉस हिंदी' मध्ये मिळणार उत्तर
By ऑनलाइन लोकमत | Updated: November 30, 2025 11:31 IST2025-11-30T11:30:45+5:302025-11-30T11:31:21+5:30
'बिग बॉस मराठी'च्या नव्या सीझनची घोषणा आज 'बिग बॉस हिंदी' मध्ये होणार? प्रेक्षकांची वाढली उत्सुकता

'बिग बॉस मराठी ६'चा नवा होस्ट कोण ? आज रात्री 'बिग बॉस हिंदी' मध्ये मिळणार उत्तर
Bigg Boss Marathi Season 6 Details: 'बिग बॉस मराठी'चा नवीन सीझन केव्हा सुरू होणार? याची प्रेक्षक गेल्या अनेक महिन्यांपासून आतुरतेने वाट पाहत होते. अखेर 'बिग बॉस' प्रेमींची प्रतीक्षा आता संपली असून लवकरच या शोचा सहावा सीझन सर्वांच्या भेटीला येणार आहे. 'बिग बॉस'च्या सहाव्या सीझनचा पहिला प्रोमो नुकताच शेअर करण्यात आला आहे. पण, या सहाव्या सीझनचा होस्ट कोण असेल? 'बिग बॉस मराठी'चा प्रिमियर कधी असणार? याबद्दल प्रेक्षकांच्या मनात कमालीची उत्सुकता निर्माण झाली आहे. पण, या सर्वांचं उत्तर आज रात्री मिळणार असल्याची शक्यता आहे.
'बिग बॉस मराठी' च्या सहाव्या सीझनबद्दल एक अत्यंत रोमांचक बातमी समोर आली आहे. आज कलर्स मराठी वाहिनीने त्यांच्या सोशल मीडिया हँडलवर एक खास पोस्टर शेअर केले आहे. ज्यामुळे चाहते अक्षरशः आनंदी झाले आहेत. या पोस्टरच्या कॅप्शनमध्ये "'बिग बॉस मराठी' फॅन्स ही लय भारी खबर ओळखलीत का?"असे लिहले आहे. पण सर्वात मोठी उत्सुकता पोस्टरच्या व्हिज्युअलने वाढवली आहे. शेअर केलेल्या पोस्टरमध्ये 'हिंदी बिग बॉस'चा होस्ट सलमान खान समोर उभा दिसतोय, पण त्याच्या अगदी मागे एका व्यक्तीची काळी आकृती दिसत आहे. ही व्यक्ती दुसरे तिसरे कोणी नसून, 'बिग बॉस मराठी'च्या सहाव्या सीझनचा होस्ट असणार असल्याची जोरदार चर्चा सोशल मीडियावर रंगली आहे. चाहते आता या 'काळी आकृती' मागील व्यक्तीची ओळख पटवण्याचा प्रयत्न करत आहेत. अनेकांनी ती व्यक्ती रितेश देशमुख असल्याचा अंदाज बांधला आहे.
आज रात्री मिळणार 'लय भारी खबर'
सर्वात महत्त्वाची गोष्ट म्हणजे, या पोस्टरमध्ये 'बिग बॉस मराठी' च्या सहाव्या सीझनबद्दलची ही मोठी 'लय भारी खबर' कधी आणि कुठे मिळणार, याची माहिती देण्यात आली आहे. पोस्टरमध्ये स्पष्टपणे म्हटले आहे की, "फॅन्सना मिळणार एक लय भारी खबर जाणून घेण्यासाठी आज रात्री पहा हिंदी 'बिग बॉस'". याचा अर्थ, आज रात्री हिंदी 'बिग बॉस'मध्ये 'बिग बॉस मराठी'च्या नव्या सीझनचे मोठे अपडेट्स, कदाचित होस्टच्या नावाची किंवा शोच्या प्रिमियरची घोषणा होण्याची शक्यता आहे. या पोस्टरमुळे आता महाराष्ट्रातील प्रेक्षकांची उत्सुकता शिगेला पोहोचली आहे.