अभिनेते योगेश महाजन यांचे निधन

Yogesh Mahajan: मराठी चित्रपटांसोबतच हिंदी पौराणिक मालिकांमध्ये आपल्या अभिनयाचा ठसा उमटवणारे मराठमोळे अभिनेते योगेश महाजन (५०) यांचे रविवारी गुजरातमधील उमरगाव येथे निधन झाले.

मुंबई - मराठी चित्रपटांसोबतच हिंदी पौराणिक मालिकांमध्ये आपल्या अभिनयाचा ठसा उमटवणारे मराठमोळे अभिनेते योगेश महाजन (५०) यांचे रविवारी गुजरातमधील उमरगाव येथे निधन झाले. ‘शिव शक्ती-तप, त्याग, तांडव’ या हिंदी मालिकेच्या शूटिंगसाठी योगेश उमरगावमध्ये होते. या मालिकेत ते शुक्राचर्यांची भूमिका साकारत होते. तिथेच हृदयविकाराचा तीव्र झटका आल्याने त्यांची प्राणज्योत मालवली. 

टीममधील लोकांनी कॉल केले, पण...
शनिवारी संध्याकाळी शूटिंगची शिफ्ट संपताना योगेश यांना प्रकृती अस्वस्थ असल्याचे जाणवले. त्यामुळे ते डॅाक्टरांकडे गेले आणि औषधे घेतली. रात्री हॅाटेलमधील रुममध्ये झोपले, पण रविवारी सकाळी शूटिंगसाठी सेटवर पोहोचले नाहीत. त्यानंतर टिममधील लोकांनी त्यांना बरेच कॅाल केले, पण त्यांनी कॅाल रिसिव्ह केला नाही. 

अखेर हॅाटेलचा दरवाजा तोडून आत गेल्यावर ते बेडवरून खाली पडलेल्या अवस्थेत आढळले. तिथेच त्यांनी अखेरचा श्वास घेतला होता. मूळचे जळगावचे असलेल्या योगेशचा जन्म सप्टेंबर १९७६मध्ये शेतकरी कुटुंबात झाला होता. अभिनयात कोणताही गॅाडफादर नसताना त्यांनी स्वबळावर मराठी, हिंदी आणि भोजपुरी मनोरंजन विश्वात आपले नाव कमावले. 

मनोरंजन विश्वाकडे वळण्यापूर्वी ते भारतीय सैन्यात होते. भोजपुरीमधून त्यांची अभिनयात एन्ट्री झाली.  'मुंबईचे शहाणे', 'संसाराची माया',  आदी मराठी चित्रपटांत त्यांनी  काम केले आहे.