महाशिवरात्रीच्या दिवशी साऊथच्या ‘नागबंधम’ सिनेमाचा टीझर प्रदर्शित, मराठमोळे महेश मांजरेकर साकारणार महत्त्वाची भूमिका

महाशिवरात्रीच्या निमित्ताने, दिग्दर्शक अभिषेक नामा यांच्या दिग्दर्शनाखाली तयार झालेल्या मायथो-अ‍ॅक्शनपट ‘नागबंधम’चा बहुप्रतीक्षित टीझर प्रदर्शित करण्यात आला आहे.

अखेर प्रतीक्षा संपली! महाशिवरात्रीच्या निमित्ताने, दिग्दर्शक अभिषेक नामा यांच्या दिग्दर्शनाखाली तयार झालेल्या मायथो-अ‍ॅक्शनपट ‘नागबंधम’चा बहुप्रतीक्षित टीझर प्रदर्शित करण्यात आला आहे. या चित्रपटात विराट कर्णा मुख्य भूमिकेत झळकणार आहेत. निर्माते किशोर अन्नापुरेड्डी आणि निशिता नागिरेड्डी यांनी हा चित्रपट भव्य स्केलवर साकारला आहे. सुपरस्टार महेश बाबूच्या हस्ते हा टीझर प्रदर्शित केला. 

‘नागबंधम’च्या टीझरच्या प्रत्येक फ्रेममध्ये साहसी दृष्टीकोन, आध्यात्मिक गूढता आणि नेत्रदीपक दृश्यांचा संगम पाहायला मिळतो. हिमालयाच्या रहस्यमय दऱ्यांच्या पार्श्वभूमीवर उलगडणारा हा टीझर एका अशा विश्वाचे दार उघडतो, जिथे काळापेक्षाही जुने एक गूढ रहस्य दडलेले आहे. जेव्हा एका माणसाचा लोभ या ब्रह्मांडीय सत्याचा शोध घेण्याचा प्रयत्न करतो, तेव्हा नियती स्वतःचा योद्धा निवडते. ‘नागबंधम’ची कथा अब्दालीच्या ऐतिहासिक अफगाण आक्रमणापासून प्रेरित असून, यात पौराणिकता, इतिहास आणि आध्यात्मिक युद्ध यांचा अनोखा मिलाफ पाहायला मिळतो. या महागाथेच्या केंद्रस्थानी आहे पवित्र नागबंधम मंदिर—एक गुप्त देवस्थान, ज्याचे रक्षण दैवी शक्ती करत आहेत आणि जिथे ब्रह्मांडाची एक प्राचीन ऊर्जा सुरक्षित असल्याचे मानले जाते. हिमालयातील लपलेल्या मार्गांमध्ये वसलेल्या या मंदिरातील अपार शक्ती चुकीच्या हातात गेल्यास अकल्पनीय विनाश होऊ शकतो.

“ब्रह्माच्या सृष्टीतून जन्मलेले... विष्णूच्या धर्माने संरक्षित... महादेवाच्या क्रोधातून शक्ती प्राप्त...” ही प्रभावी ओळ ‘नागबंधम’च्या आत्म्याचे सार मांडते. ही एक अशी गाथा आहे, जिथे दैवत्व, नियती आणि विनाश यांची थरारक भिडत होते. दिग्दर्शक अभिषेक नामा यांची भव्य दृष्टी आणि स्पष्ट व्हिजन टीझरमध्ये प्रकर्षाने जाणवते. पौराणिकता, अ‍ॅक्शन आणि अध्यात्म यांना उत्कृष्ट तांत्रिक बाजूसोबत जोडत त्यांनी चित्रपटाला वेगळ्याच उंचीवर नेले आहे. विशेष म्हणजे, एकही संवाद नसतानाही हा टीझर आपल्या प्रभावी दृश्यांमुळे आणि दमदार कथनशैलीमुळे प्रेक्षकांना खिळवून ठेवतो.

पहिल्याच फ्रेमपासून ‘नागबंधम’ हा एक भव्य व्हिज्युअल एपिक असल्याची जाणीव करून देतो. सिनेमॅटोग्राफर सुंदर राजन एस यांनी नेत्रदीपक दृश्ये प्रभावीपणे कॅमेऱ्यात टिपली आहेत, तर हाय-एंड VFXमुळे चित्रपटाचा स्केल आणखी भव्य वाटतो. अशोक कुमार यांचे भव्य प्रॉडक्शन डिझाइन, जुनैद कुमार यांचा अंगावर काटा आणणारा बॅकग्राउंड स्कोअर आणि आरसी प्रणव यांचे नेमके संपादन प्रेक्षकांना एका वेगळ्याच विश्वात घेऊन जाते—जिथे भक्ती युद्धात परिवर्तित होते आणि आस्था क्रोधात बदलते. ही निर्मात्यांची पहिलीच फिल्म असली तरी त्यांची काम करण्याची पद्धत अत्यंत दमदार दिसते. दिग्दर्शकाच्या भव्य व्हिजनला त्यांनी पूर्ण पाठबळ दिले आहे. मोठ्या सेट्सपासून ते VFXपर्यंत प्रत्येक तांत्रिक बाबीवर घेतलेली मेहनत स्पष्ट दिसते, ज्यामुळे हा चित्रपट भारतीय सिनेमासाठी एक नवा मापदंड ठरू शकतो.

मुख्य भूमिकेत असलेले विराट कर्णा अत्यंत दमदार आणि बदललेल्या अवतारात दिसत आहेत. टीझरमध्ये मगराशी झालेली त्यांची झुंज आणि भगवान शिवाच्या रूपातील त्यांची एंट्री हा मोठा हायलाइट ठरतो. शिवाची भूमिका साकारणे सोपे नसते, मात्र विराट यांनी ती प्रचंड समर्पणाने साकारली असल्याचे जाणवते. त्यांची तीव्रता आणि शारीरिक परिवर्तन पाहता, ही त्यांच्या कारकिर्दीतील संस्मरणीय भूमिका ठरणार असल्याचे संकेत मिळतात. चित्रपटात नभा नतेश, ईश्वर्या मेनन, महेश मांजरेकर, जगपति बाबू, ऋषभ साहनी, गरुड राम, जयप्रकाश, मुरली शर्मा, अनसूया भारद्वाज आणि बी.एस. अविनाश हे कलाकार महत्त्वाच्या भूमिकांमध्ये झळकणार आहेत. सर्व स्तरांतून मिळत असलेल्या सकारात्मक प्रतिसादामुळे ‘नागबंधम’ 2026 मधील सर्वाधिक प्रतीक्षित पॅन-इंडिया चित्रपटांपैकी एक ठरला आहे. टीझर पाहिल्यानंतर हे स्पष्ट होते की प्रेक्षकांना श्रद्धा, क्रोध आणि नियती यांचा भव्य संग्राम अनुभवायला मिळणार आहे.