"आता थांबायचं नाय" च्या चित्रिकरणाला सुरुवात, तगडी स्टारकास्ट असलेला सिनेमा लवकरच प्रेक्षकांच्या भेटीला!

तगडी स्टारकास्ट असलेला "आता थांबायचं नाय" हा सिनेमा लवकरच प्रेक्षकांच्या भेटीला येणार आहे.

Aata Thambaycha Nay : आशियामधील सर्वात श्रीमंत समजली जाणारी भारतातील मानाची बृहन्मुंबई महानगरपालिकाच्या सहकार्याने 'आता थांबायचं नाय' हा 'झी स्टुडिओज'चा आगामी मराठी चित्रपट प्रेक्षकांच्या भेटीला येतोय. अभिनेते भरत जाधव, सिद्धार्थ जाधव, ओम भुतकर, श्रीकांत यादव, पर्ण पेठे, प्रवीणकुमार डाळिंबकर, प्राजक्ता हनमघर, किरण खोजे आणि आशुतोष गोवारीकरअशी तगडी स्टारकास्ट सिनेमात आहे. पहिल्यांदाच हे सर्व दिग्गज कलाकार एकत्र आल्याने या चित्रपटाची कथा काय असणार याचं औत्सुक्य प्रेक्षकांमध्ये नक्कीच आहे. 'झी स्टुडिओज', 'चॉक अँड चीज' आणि 'फिल्म जॅझ' प्रॉडक्शनची एकत्र निर्मिती असलेल्या 'आता थांबायचं नाय' या सिनेमाचं लेखन आणि दिग्दर्शन शिवराज वायचळने केलं आहे.

हृदयाला भिडणाऱ्या अद्वितीय प्रेरणादायी सिनेमाच्या  निर्मितीसाठी लोकप्रिय आणि विश्वसनीय 'झी स्टुडिओज' ही संस्था पुढे आली आहे. त्यांच्यासोबत हिंदी चित्रपट क्षेत्रातील नावाजलेले निर्माते निधी परमार-हिरानंदानी, धरम वालीया ही धुरा उत्तम निभावत आहेत. या निर्मितीमध्ये त्यांचे मोलाचे योगदान आहे. तसेच 'श्रीकांत' फेम तुषार हिरानंदानी हे या सिनेमासाठी क्रिएटिव्ह प्रोड्यूसर म्हणून काम पाहत आहेत. नुकतंच १६ डिसेंबर २०२४ रोजी 'आता थांबायचं नाय' या सिनेमाचा ग्रांट रोड येथील गिल्डर टँक महापालिकेच्या शाळेत मुहुर्त संपन्न झाल्यानंतर लगेचच चित्रीकरणास सुरुवात करण्यात आली आहे. यावेळी मुंबई महानगर पालिका आयुक्त माननीय भूषण गगराणी, महापालिका उपायुक्त किरण दिघावकर,  झी स्टुडिओजचे चिफ बिझनेस ऑफिसर उमेश के बन्सल,  झी स्टुडिओजचे बिझनेस हेड बवेश जानवलेकर, निर्माते निधी परमार - हिरानंदानी, धरम वालीया, क्रिएटिव्ह प्रोड्युसर तुषार हिरानंदानी, निवृत्त सनदी मनपा अधिकारी उदयकुमार शिरुरकर या मान्यवरांसह चित्रपटातील मुख्य कलाकार आणि तंत्रज्ञ उपस्थित होते. 

मराठी चित्रपटविश्वात एका कर्तबगार आणि संवेदनशील अधिकाऱ्यासंबंधीची ही सत्यकथा नक्कीच वेगळी ठरणार आहे.  "मुंबई महानगरपालिकेतील कर्मचाऱ्यांच्या आयुष्यात तेजाचा किरण आणणाऱ्या एका व्यक्तिमत्त्वाचा प्रवास मांडण्याची संधी मिळणं, ही गोष्ट 'झी स्टुडिओज'साठी अत्यंत भाग्याची आहे. मराठीत येणारा एक वेगळा आणि प्रेरणादायी सिनेमा पाहणं, ही एक पर्वणीच ठरणार आहे", असं झी स्टुडिओजचे चिफ बिझनेस ऑफिसर उमेश के बन्सल यांनी म्हटलं. 

"मुंबई महानगरपालिकेमधल्या कर्तबगार कर्मचाऱ्यांच्या आयुष्याची कहाणी सांगणारा हा सिनेमा एका सत्यघटनेवर आधारित आहे. मात्र, ही घटना अत्यंत प्रेरणादायी असू मराठीत पहिल्यांदाच अशाप्रकारची मांडणी केली जाणार आहे. मुंबई महापालिकेने या चित्रपटासाठी जे सहकार्य दिलं आहे, त्यासाठी एक मुंबईकर आणि सिनेव्यवसायिक म्हणून आम्ही नक्कीच आभारी आहोत", असं झी स्टुडिओचे बिझनेस हेड बवेश जानवलेकर यांनी म्हटलं. 

"साधारण शासन असेल किंवा महापालिका असेल नेहमी काय केलं जात नाही, या टीकेला आम्हाला दैंनदिन सामोरं जावं लागतं. महापालिकेत म्हणा, शासनात म्हणा, अनेक चांगले उपक्रम चालू असतात. चांगले अधिकारी असतात. ते चांगली कामे करीत असतात. त्याच्या नोंदी बऱ्याच वेळा घेतल्या जात नाहीत किंवा घेतल्या तर त्यात काही त्रुटी राहतात. म्हणूनच या चित्रपटाच्या माध्यमातून चांगला उपक्रम आपल्यासमोर येतोय. या कामांची नोंद कायमस्वरूपी घेतली जाईल आणि लोकांपर्यंत पोहचण्यास मदत होईल. म्हणूनच मला महापालिकेच्यावतीने आनंद व्यक्त करावासा वाटतोय. मी सर्वांचे अभिनंदन करतो", असे बृहन्मुंबई महानगरपालिकेचे आयुक्त भूषम गगराणी म्हणालेत.

"मुंबई महानगरपालिकेचे कर्मचारी खरंच काय करू शकतात, याची चुणूक दाखवणारी आमच्या गुणी अधिकाऱ्यांच्या कामाची दखल घेणारी कलाकृती तयार होतेय, याचा आनंद आहे",  असं मुंबई महापालिकाचे उपायुक्त किरण दिघावकर यांनी म्हटलं. 

"प्रशासकीय अधिकारी म्हणून काम पाहताना कायमच नागरिकांच्या हिताचे निर्णय घेण्याचा प्रयत्न केला. मात्र त्याचबरोबर आमच्या कर्मचाऱ्यांचीही प्रगती व्हावी, असा विचार मनात आला आणि त्यावर अंमलबजावणीही केली. हा प्रवास आता चित्रपटातून मांडला जाणार आहे. अधिकारी म्हणून काम करताना जे आनंदाचे आणि समाधानाचे क्षण असतात त्यातला एक क्षण आता या सिनेमाद्वारे कायमचा आठवणीत राहणार आहे", अशा भावना निवृत्त सनदी अधिकारी उदयकुमार शिरुरकर यांनी व्यक्त केल्या.