सलमान खानच्या करिअरमधील मोठा निर्णय! वडील सलीम खान यांच्यावरील बायोपिक सिनेमाचं दिग्दर्शन करणार?

सलमान खानचे वडील आणि दिग्गज लेखक सलीम खान यांच्यावर बायोपिक सिनेमा येणार असल्याची चर्चा आहे. त्यामुळे सर्वांची उत्सुकता शिगेला आहे.

बॉलिवूडचा 'सुलतान' सलमान खान आपल्या कुटुंबाप्रती असलेल्या प्रेमासाठी नेहमीच ओळखला जातो. आता त्याने आपल्या वडिलांसाठी, म्हणजेच दिग्गज पटकथा लेखक सलीम खान यांच्यासाठी एक अत्यंत खास आणि भावनिक प्रोजेक्ट हाती घेतला आहे. मिळालेल्या माहितीनुसार, सलमान खान लवकरच वडील सलीम खान यांच्या जीवनावर आधारित 'बायोपिक'ची निर्मिती करणार असल्याची चर्चा आहे.

सलमान खानसाठी हा केवळ एक चित्रपट नसून, आपल्या वडिलांच्या गौरवशाली कारकिर्दीला दिलेली एक मानवंदना असणार आहे. सलीम खान यांनी केवळ सलमानचे करिअर घडवले नाही, तर भारतीय सिनेमाला एक नवी दिशा दिली. 'शोले', 'जंजीर' आणि 'दीवार' यांसारख्या अजरामर चित्रपटांच्या लेखनामागे त्यांचा मोठा वाटा आहे. हा बायोपिक त्यांच्या संघर्षापासून ते यशाच्या शिखरापर्यंतचा प्रवास प्रेक्षकांसमोर मांडणार आहे.

स्वतः सलमान करणार दिग्दर्शन?

काही रिपोर्ट्सनुसार, सलमान खान या चित्रपटाची केवळ निर्मितीच करणार नाही, तर तो स्वतः या चित्रपटाद्वारे दिग्दर्शन क्षेत्रातही पाऊल टाकेल अशी शक्यता आहे. त्याला आपल्या वडिलांची गोष्ट अत्यंत अचूकपणे आणि संवेदनशीलतेने पडद्यावर मांडायची आहे, त्यामुळे तो दिग्दर्शनाची जबाबदारी स्वतःच्या खांद्यावर घेण्याची शक्यता आहे. हा प्रोजेक्ट २०२७ च्या सुरुवातीला फ्लोअरवर जाण्याची शक्यता वर्तवण्यात येत आहे.

सलीम-जावेद जोडीचाही उल्लेख?

सलीम खान आणि जावेद अख्तर यांची जोडी बॉलिवूडमधील सर्वात यशस्वी लेखकांची जोडी मानली जाते. त्यामुळे या बायोपिकमध्ये या जोडीचा प्रवास, त्यांच्यातील मैत्री आणि व्यावसायिक नाते याचंही दर्शन घडण्याची शक्यता आहे. या चित्रपटात सलीम खान यांची भूमिका कोणता अभिनेता साकारणार, याबाबत मात्र अद्याप कमालीची गुप्तता पाळण्यात आली आहे. सलमान खान सध्या त्याच्या आगामी 'बॅटल ऑफ गलवान' या चित्रपटामुळे चर्चेत आहे, जो एप्रिल २०२६ मध्ये प्रदर्शित होणार आहे.