थिएटरमध्ये आता फू-फू करणार नाही 'नंदू'! सेन्सॉर बोर्डानं हटवली अक्षय कुमारची ६ वर्षे जुनी जाहिरात

Akshay Kumar : चित्रपटांव्यतिरिक्त अक्षय कुमार अनेक प्रकारच्या टीव्ही जाहिरातींसाठी ओळखला जातो. यातील काही जाहिराती अशा आहेत ज्याद्वारे त्या देशातील जनतेला जागरूक करतात.

जेव्हा तुम्ही चित्रपटगृहात चित्रपट पहायला जाता, तेव्हा तो सुरू होण्यापूर्वी मोठ्या पडद्यावर जवळपास १५ मिनिटे जाहिराती दाखवल्या जातात. ज्यामध्ये अनेक धूम्रपान विरोधी जाहिरातींचा समावेश आहे. त्यापैकी एक जाहिरात अभिनेता अक्षय कुमार(Akshay Kumar)ची देखील आहे, ज्यामध्ये तो हॉस्पिटलसमोर धुमाकूळ घालणाऱ्या नंदूला सिगारेट सोडण्यास सांगताना दिसतो. बातमी अशी आहे की, अक्षय कुमार आणि नंदूची भूमिका असलेली ही जाहिरात आता प्रेक्षकांना रुपेरी पडद्यावर पाहायला मिळणार नाही. सेन्सॉर बोर्डाने अभिनेत्याची ही ६ वर्षे जुनी जाहिरात काढून टाकण्याचा मोठा निर्णय घेतला आहे. 

चित्रपटगृहांमध्ये धुम्रपान विरोधी जाहिरातींच्या माध्यमातून लोकांमध्ये धूम्रपानाविरोधात जनजागृती करण्याचे काम केले जाते. अक्षय कुमारही हे काम नंदूच्या जाहिरातींच्या माध्यमातून खूप दिवसांपासून करत आहे. या जाहिरातीत त्याच्यासोबत अभिनेता अजय पाल सिंग दिसत आहे, ज्याने नंदूची भूमिका साकारली आहे.

CBFC ने ही जाहिरात काढून टाकण्याचा घेतला निर्णय

बॉलिवूड हंगामाच्या रिपोर्टनुसार, सेंट्रल बोर्ड ऑफ फिल्म सर्टिफिकेशन म्हणजेच CBFC ने ही जाहिरात काढून टाकण्याचा निर्णय घेतला आहे आणि आगामी काळात अक्षय कुमारची धूम्रपान विरोधी जाहिरात तुम्हाला पुन्हा रुपेरी पडद्यावर दिसणार नाही. अक्षय कुमारच्या या जाहिरातीमध्ये धुम्रपानविरोधी व्यतिरिक्त, मासिक पाळीच्या दरम्यान साथीच्या आजारांपासून बचाव करण्यासाठी महिलांमध्ये सॅनिटरी पॅड वापरण्याबाबत जागरूकता दिसून येते. या जाहिरातीशिवाय, सेन्सॉर बोर्ड मोठ्या पडद्यावर धूम्रपानविरोधी एक नवीन जाहिरात प्रसारित करताना दिसणार आहे.

६ वर्षांपूर्वी ही जाहिरात आली होती भेटीला
अक्षय कुमारची ही नंदू जाहिरात सहा वर्षांपूर्वी सुरू झाली होती. जेव्हा अभिनेत्याचा गोल्ड हा चित्रपट स्वातंत्र्य दिनानिमित्त थिएटरमध्ये प्रदर्शित झाला होता आणि दुसरीकडे ही धूम्रपान विरोधी जाहिरात देखील प्रथमच प्रसारित झाली होती. याच वर्षी ९ फेब्रुवारीला गोल्डच्या आधी प्रदर्शित झालेल्या अक्षयच्या पॅडमॅन चित्रपटाच्या प्रमोशनचा आधार म्हणूनही ही जाहिरात ओळखली जाते.