कतरिना कैफ अन् विकीची मुलाच्या जन्मानंतरची पहिली होळी ठरली खास, शेअर केली खास झलक

कतरिनाने सोशल मीडियावर या सेलिब्रेशनची एक खास झलक शेअर केली आहे. यात संपूर्ण 'कौशल फॅमिली' रंगात रंगलेली दिसत आहे.

बॉलिवूडची लोकप्रिय अभिनेत्री कतरिना कैफ आणि तिचा पती विकी कौशल यांच्यासाठी यंदाची होळी अत्यंत आनंदाची आणि अविस्मरणीय ठरली आहे.  आई-बाबा झाल्यानंतर त्यांची ही पहिलीच होळी होती.  कतरिनाने सोशल मीडियावर या सेलिब्रेशनची एक खास झलक शेअर केली आहे. यात संपूर्ण 'कौशल फॅमिली' रंगात रंगलेली दिसत आहे.

लग्नाच्या चार वर्षांनंतर ७ नोव्हेंबर २०२५ रोजी कतरिना आणि विकीच्या आयुष्यात छोट्या पाहुण्याचं आगमन झालं. आपल्या मुलाच्या जन्मानंतरची ही पहिलीच होळी असल्याने कतरिना खूपच उत्साही दिसत होती. तिने शेअर केलेल्या फोटोमध्ये ती पती विकी कौशल, दीर सनी कौशल आणि बहीण इसाबेल कैफ यांच्यासोबत आनंदाने पोज देताना दिसत आहे. पांढरा टी-शर्ट आणि रंगाने माखलेली कतरिना अशा साध्या लूकमध्येही अधिकच सुंदर दिसत आहे. फोटोमध्ये सनी कौशलच्या हातात एक खेळण्यातील पाण्याची बंदूक (पिचकारी) दिसत आहे. तर विकी कौशलने 'कॅज्युअल' लूक केला होता. कतरिना लग्नानंतर नेहमीच आपल्या सासरच्या मंडळींसोबत सण साजरे करताना दिसते. 

९ डिसेंबर २०२१ रोजी राजस्थानमध्ये एका शाही सोहळ्यात विकी आणि कतरिना विवाहबंधनात अडकले होते. कतरिनाने आई झाल्यानंतर कामातून थोडा ब्रेक घेतला असला तरी, ती सोशल मीडियाच्या माध्यमातून चाहत्यांच्या संपर्कात असते. विकी कौशलचा अलीकडेच  'छावा' हा चित्रपट ब्लॉकबस्टर ठरला असून, आता तो संजय लीला भन्साळी यांच्या 'लव्ह अँड वॉर' मध्ये रणबीर कपूर आणि आलिया भट्टसोबत दिसणार आहे. तर कतरिना शेवटची 'मेरी ख्रिसमस' मध्ये दिसली होती. सध्या तिने तिच्या आगामी प्रोजेक्ट्सबद्दल कोणतीही अधिकृत घोषणा केलेली नाही, कारण ती सध्या आपल्या मुलासोबत वेळ घालवत आहे.