'मिसेस देशपांडे' शूटच्या शेवटच्या दिवशी..., सिद्धार्थ चांदेकरने माधुरी दीक्षितसाठी लिहिली पोस्ट

माधुरी दीक्षितच्या लेकाच्या भूमिकेत दिसला सिद्धार्थ चांदेकर

काही दिवसांपूर्वीच जिओ हॉटस्टारवर माधुरी दीक्षितची 'मिसेस देशपांडे' सीरिज आली. या सीरिजमध्ये माधुरी पहिल्यांदाच सीरियल किलरच्या भूमिकेत दिसली. सस्पेन्स, थ्रिलर कंटेंटचे जे चाहते आहेत त्यांना ही सीरिज प्रचंड आवडली. नागेश कुकनूर यांनी सीरिज दिग्दर्शित केली होती. तर मराठी अभिनेतासिद्धार्थ चांदेकरही यामध्ये होता. त्याने माधुरीच्या मुलाची भूमिकेत होता. आता नुकतंच त्याने माधुरीसोबतचा फोटो शेअर करत छानसं कॅप्शन लिहिलं आहे.

माधुरी दीक्षितचे चाहते कोण नाहीत? तिच्या सौंदर्यावर, तिच्या गोड स्माईलवर आजही सगळेच फिदा आहेत. सिद्धार्थ चांदेकरला तर तिच्यासोबत काम करण्याची संधी मिळाली. सीरिजमध्ये तो पोलिस अधिकारी आहे जो माधुरीचा मुलगाच आहे. माधुरीसोबतचा सेल्फी शेअर करत त्याने लिहिले, "एक वर्षापूर्वी आम्ही मिसेस देशपांडे सीरिजचं शूट संपवलं. संपूर्ण ६० दिवसांच्या शूटिंगमध्ये मी माधुरीसोबत फोटो काढण्यापासून स्वत:वर नियंत्रण ठेवलं होतं. पण शेवटच्या दिवशी माझ्यातला चाहता जागा झाला आणि माझं स्वत:वरचं नियंत्रण सुटलं. my fan moment"

सिद्धार्थ चांदेकरची ही पोस्ट वाचून कोणीही चाहता सहमत असेल. माधुरी ८०-९० च्या दशकात तरुणाईच्या हृदयाची धडकन होती. आजही तिच्या सौंदर्यात थोडीही कमी जाणवत नाही. तिचे एक्सप्रेशन्स आजही हृदयाचा ठोका चुकवणारे आहेत. तिला इतक्या वर्षांनी पुन्हा एका वेगळ्या भूमिकेत पाहून सर्वांनाच मजा आली. 'मिसेस देशपांडे' सीरिजचा पुढचा पार्टही येईल अशी चर्चा आहे.