'माझी तुझी रेशीमगाठ'मध्ये परीच्या खऱ्या बाबाची एन्ट्री, हा अभिनेता साकारणार नेहाच्या पहिल्या पतीची भूमिका

Mazi Tuzi Reshimgath: 'माझी तुझी रेशीमगाठ' या मालिकेत नेहा आणि यशचे लग्न संपन्न झाले आहे.

माझी तुझी रेशीमगाठ (Mazi Tuzi Reshimgath) या मालिकेत नेहा आणि यशचे लग्न संपन्न झाले आहे. मालिकेचे प्रेक्षक या क्षणाची गेल्या कित्येक दिवसांपासून वाट पाहत होते. अखेर रविवारच्या विशेष भागात त्यांचा हा सोहळा मोठ्या थाटामाटात पार पडला. नेहा आणि यशच्या लग्नात एका पात्राची एन्ट्री झाली होती. हे पात्र म्हणजेच नेहाचा पहिला नवरा. नेहा आणि यशच्या लग्नसोहळ्यात तिचा नवरा विघ्न तर आणणार नाही ना अशी शंका उपस्थित केली जात होती. मात्र हे लग्न सुखरूप पार पडलेले पाहायला मिळाले. मालिकेत यश आणि नेहाचा संसार खुलू लागला आहे. आता अशातच तिच्या पहिल्या नवऱ्याची एन्ट्री होणार आहे. हे पात्र साकारणारा अभिनेता कोण असेल? हे जाणून घेण्यासाठी प्रेक्षक उत्सुक आहेत.

मालिकेत नेहाच्या पहिल्या नवऱ्याच्या भूमिकेत अभिनेता निखिल राजेशिर्के दिसणार आहे. निखिल राजेशिर्केने अनेक गाजलेल्या मालिकांमधून, नाटकांमधून तसेच चित्रपटांमधून महत्वपूर्ण भूमिका साकारल्या आहेत. माझी तुझी रेशीमगाठ या मालिकेत देखील त्याची तितकीच दमदार भूमिका असणार आहे. ८ दोन ७५ हा त्याचा अभिनित केलेला आगामी मराठी चित्रपट लवकरच प्रेक्षकांच्या भेटीला येत आहे. 

निखिल राजेशिर्केला बालपणापासूनच अभिनयाची आवड होती. रुईया कॉलेजमध्ये असताना त्याने नाट्यस्पर्धा, एकांकिका मधून सहभाग दर्शवला होता. यातूनच त्याला मालिकांमधून झळकण्याची संधी मिळाली. छोटी मालकीण,लगोरी, प्रीती परी तुजवरी, अजूनही बरसात आहे, असेही एकदा व्हावे, बाईकर्स अड्डा, फोर इडियट्स, स्ट्रॉबेरी अशा मालिका चित्रपट तसेच नाटकांमधून त्याला महत्वपूर्ण भूमिका मिळत गेल्या.

मुव्हिंग आउट या वेबसिरीजला प्रेक्षकांनी खूप चांगला प्रतिसाद दिला. अभिज्ञा भावे सोबत त्याची या वेबसिरीजमध्ये चांगले बॉंडिंग जुळून आले होते. माझी तुझी रेशीमगाठ आणि अजूनही बरसात आहे या मालिकेतील त्याच्या भूमिका काहीशा विरोधी ढंगाच्या असलेल्या पाहायला मिळत आहेत. अजूनही बरसात आहे या मालिकेत तो मीराचा मित्र निखिलच्या भूमिकेत दिसला होता. माझी तुझी रेशीमगाठ या मालिकेतही तो अशाच धाटणीची भूमिका साकारताना दिसणार आहे. आता सिम्मी काकूंना देखील नेहाचा भूतकाळ ठाऊक आहे. त्यामुळे सिम्मी काकू आणि नेहाचा पहिला नवरा हे दोघे मिळून नेहाला त्रास देताना दिसणार आहेत. नेहा आणि यशच्या सुखी संसारात तिच्या पहिल्या नवऱ्याच्या एन्ट्रीनंतर काय घडणार, हे पाहणे कमालीचे ठरणार आहे.