'फुलाला सुगंध मातीचा' मालिकेतील शुभम-कीर्ती पुन्हा आले एकत्र!

Samruddhi Kelkar And Harshad Atkari : 'फुलाला सुगंध मातीचा' मालिकेतून प्रेक्षकांच्या घराघरात पोहोचलेली लाडकी जोडी अर्थात शुभम आणि कीर्ती म्हणजेच अभिनेत्री समृद्धी केळकर आणि हर्षद अतकरी पुन्हा एकदा एकत्र दिसणार आहेत.

स्टार प्रवाह वाहिनीवरील फुलाला सुगंध मातीचा मालिकेतून प्रेक्षकांच्या घराघरात पोहोचलेली लाडकी जोडी अर्थात शुभम आणि कीर्ती म्हणजेच अभिनेत्री समृद्धी केळकर (Samruddhi Kelkar) आणि हर्षद अतकरी (Harshad Atkari ) पुन्हा एकदा एकत्र दिसणार आहेत. मी होणार सुपरस्टार जोडी नंबर वनच्या गुढीपाडवा विशेष भागात ते दोघे एकत्र येणार आहेत. या कार्यक्रमात समृद्धीला सूत्रसंचालनात अभिनेता हर्षद अतकरी साथ देणार आहे.

यंदाच्या पर्वाचं वेगळेपण म्हणजे स्पर्धक जोडीने नृत्य सादर करतात. आई-मुलगी, गुरु-शिष्य, मामा-भाचे, बहिणी-बहिणी अशी अनेक नाती आणि त्यांची नृत्यकला या मंचावर पहायला मिळत आहे. स्पर्धकांसोबतच सूत्रसंचालनही जोडीने सादर होते आहे. समृद्धीसोबतच स्टार प्रवाह परिवारातले कलाकार सूत्रसंचालकाची भूमिका पार पाडतात. मन धागा धागा मालिकेतील सार्थक आणि साधी माणसं मालिकेतील सत्यानंतर आता अभिनेता हर्षद अतकरी सूत्रसंचानलाची भूमिका पार पाडताना दिसेल. 

समृद्धी आणि हर्षदच्या जोडीला प्रेक्षकांचं भरभरुन प्रेम मिळाले आहे. त्यामुळे ही लोकप्रिय जोडी पुन्हा एकदा पहाण्याची संधी मी होणार सुपरस्टार जोडी नंबर वनचा मंच घेऊन आला आहे. तेव्हा मी होणार सुपरस्टार जोडी नंबर वन शनिवार आणि रविवारी रात्री ९ वाजता फक्त स्टार प्रवाहवर पाहायला मिळेल.