फ्लॉप चित्रपटांमुळे त्रस्त झालेत तारे

या शुक्रवारी प्रदर्शित होणाऱ्या तमाशा चित्रपटाच्या प्रमोशनसाठी रणबीर कपूर आणि दीपिका पदुकोण ही जोडी लोकमतच्या मुंबई कार्यालयात आली होती. या वेळी रणबीरला विचारण्यात आलेल्या एका प्रश्नामुळे तो थोडा उदास झाला. तुझे मागील तीन प्रदर्शित चित्रपट बॉक्स आॅफिसवर का चालले नाहीत, असा हा प्रश्न होता. यावर रणबीर म्हणाला, मागील तीन चित्रपट अपयशी ठरले हे खरे आहे. म्हणूनच तमाशा चित्रपटाबाबत मला थोडा प्रेशर जाणवत आहे. रणबीर कपूरचा हा दबाव विनाकारण नाही. जेव्हा सलग तीन मोठे चित्रपट बॉक्स आॅफिसवर सुपर फ्लॉप झाले तर मोठमोठ्या स्टार मंडळींना असे टेन्शन येतेच. तसे पाहता रणबीर कपूरच्या करिअरची सुरुवातच फ्लॉप चित्रपटाने झाली होती. शाहरूख खानच्या ओम शांती ओमच्या स्पर्धेवेळी प्रदर्शित झालेला रणबीर कपूरचा पहिला चित्रपट सांवरियाने बॉक्स आॅफिसवर ‘पाणीही मागितले नव्हते’ आणि ओम शांती ओमसोबत हा सामना एकतर्फी झाला होता.
बॉलीवूडचा इतिहास सांगतो की, जवळपास सर्वच मोठ्या स्टार मंडळींनी सलग फ्लॉप चित्रपटांचा काळ सहन केला आणि नंतर ते यशाच्या मार्गावर परतले. जास्त
दूर न जाता सध्याच्या स्टारलाच पाहिले तर ही गोष्ट लक्षात येते. रणबीर कपूरप्रमाणे शाहिद कपूरदेखील मोठ्या काळापासून फ्लॉप चित्रपटांचा मार सहन करीत आहे. जब वी मेटच्या यशानंतर शाहिद फ्लॉप-हिट चित्रपटांमध्ये गुंतला आहे. मौसम, आर. राजकुमार, फटा पोस्टर निकला हीरो आणि हैदरनंतर नुकत्याच प्रदर्शित झालेल्या शानदारच्या अपयशाने त्याची कंबरच तोडली आहे. हृतिक रोशननेदेखील फ्लॉप चित्रपटांचा मोठा काळ पाहिला आहे. कहो ना प्यार हैनंतर हृतिक रोशनचे करिअर फ्लॉप चित्रपटांच्या संकटांनी वेढले गेले. यादें, आप मुझे अच्छे लगने लगे, मैं प्रेम की दीवानी, मुझसे दोस्ती करोगे या चित्रपटांमुळे त्याच्या करिअरवर प्रश्नचिन्ह निर्माण केले होते. भले हो त्याचे वडील राकेश रोशनचे, ज्यांनी प्रथम कोई मिल गया आणि नंतर क्रिशच्या मालिकेद्वारे आपल्या मुलाला या संकटातून बाहेर काढण्यात यश मिळविले. यामध्ये सलमान खानचे उदाहरणदेखील दिले जाऊ शकते.

- anuj.alankar@lokmat.com