राष्ट्रीय फिल्म पुरस्कार सोहळ्यात साडीत मिरवणारी त्रिशा नक्की आहे तरी कोण? जिकडेतिकडे होतेय चिमुकलीची चर्चा

राष्ट्रीय चित्रपट पुरस्कार सोहळ्यातील व्हिडीओ व्हायरल झाल्यानंतर त्रिशाचं सर्वत्र कौतुक होत आहे. पण राष्ट्रीय पुरस्कार सोहळ्यात साडी नेसून मिरवणारी त्रिशा नक्की आहे तरी कोण?

71st National Film Awards: ७१वा राष्ट्रीय चित्रपट पुरस्कार सोहळा नुकताच पार पडला. मंगळवारी(२३ सप्टेंबर) दिल्लीत राष्ट्रपती द्रौपदी मुर्मूंच्या हस्ते राष्ट्रीय पुरस्कार विजेत्यांचा गौरव करण्यात आला.

मराठीतील ४ बालकलाकारांना यंदाच्या राष्ट्रीय पुरस्कारात सन्मानित करण्यात आले. 'नाळ २' चित्रपटासाठी श्रीनिवास पोकळे, त्रिशा ठोसर, भार्गव जगताप तर जिप्सी सिनेमासाठी कबीर खांडारे याला सर्वोत्कृष्ट बालकलाकाराचा पुरस्कार मिळाला.

पण, या सगळ्यात लक्ष वेधून घेतलं ते चिमुकल्या त्रिशा ठोसर हिने. राष्ट्रीय पुरस्कार स्वीकारण्यासाठी त्रिशा चक्क साडी नेसून गेली होती.

४ वर्षीय त्रिशाचा आत्मविश्वास पाहून उपस्थितही भारावून गेले. त्रिशा स्टेजवर जाताच सगळ्यांनी टाळ्यांचा गडगडात तिला प्रोत्साहन दिलं.

राष्ट्रीय चित्रपट पुरस्कार सोहळ्यातील व्हिडीओ व्हायरल झाल्यानंतर त्रिशाचं सर्वत्र कौतुक होत आहे. पण राष्ट्रीय पुरस्कार सोहळ्यात साडी नेसून मिरवणारी त्रिशा नक्की आहे तरी कोण?

त्रिशा ही मराठी सिनेसृष्टीतील लोकप्रिय बालकलाकार आहे. काही सिनेमा, जाहिराती आणि वेब सीरिजमध्ये तिने काम केलं आहे.

'नाळ २'मध्ये त्रिशाने चिमीची भूमिका साकारली होती. सिद्धार्थ जाधवच्या सिनेमातही ती झळकली आहे.

महेश मांजरेकरांच्या आगामी मराठी सिनेमात त्रिशा महत्त्वाची भूमिका साकारताना दिसणार आहे.

'मानवत मर्डर्स', 'पेट पुराण' या वेब सीरिजमध्येही त्रिशा झळकली आहे.