'लक्ष्या-अशोक मामांची लाट आल्यामुळे मी साईड ट्रॅक झालो'; अजिंक्य देवने व्यक्त केली खंत

Ajinkya deo: अजिंक्य देवने अनेक गाजलेले सिनेमा मराठी इंडस्ट्रीला दिले. परंतु, एक काळ असा होता ज्यावेळी त्याला साईड ट्रॅक झाल्यासारखं वाटलं होतं.

मराठी कलाविश्वाचा 80-90 चा काळ गाजवणारा हँडसम, देखणा अभिनेता म्हणजे अजिंक्य देव (Ajinkya deo).  उत्तम अभिनयशैली आणि त्याहीपेक्षा त्याची जबरदस्त पर्सनालिटी या दोन गोष्टींमुळे अजिंक्य देव त्याकाळी अनेक तरुणींच्या गळ्यातलं ताईत झाला होता. तेव्हाच कशाला आजही त्याची क्रेझ तरुणींमध्ये पाहायला मिळते. आज अजिंक्य देवने वयाची साठी गाठली आहे. पण,त्याचा फिटनेस विशीच्या तरुणाला लाजवेल असाच आहे. त्यामुळे त्याची वरचेवर चाहत्यांमध्ये चर्चा होत असते. अलिकडेच त्याने 'लोकमत फिल्मी'ला मुलाखत दिली. या मुलाखतीमध्ये त्याने काही गोष्टींचा उलगडा केला.

आजवरच्या कारकिर्दीत अजिंक्य देवने अनेक गाजलेले सिनेमा मराठी इंडस्ट्रीला दिले. परंतु, एक काळ असा होता ज्यावेळी त्याला साईड ट्रॅक झाल्यासारखं वाटलं होतं. याविषयी त्याने पहिल्यांदाच भाष्य केलं. विशेष म्हणजे लक्ष्मीकांत बेर्डे आणि अशोक सराफ या जोडगोळीचा एक सिनेमा रिलीज झाल्यानंतर तो साईड ट्रॅक झाला असं त्याने या मुलाखतीत म्हटलं.

"अॅक्शन असेल तर त्यासाठी हिंदी सिनेमा पाहायचा आणि इमोशन्स, आपले घरगुती प्रश्न सोडवणारा असं काही भावनिक असेल तर मग तो मराठी चित्रपट असायचा, असं त्यावेळी एक होतं. या ट्रान्झेक्शनमध्ये मी होतो त्यामुळे सुरुवातीला माझे पहिले काही सिनेमा चांगले चालले. त्यानंतर मग लक्ष्याची लाट आली", असं अजिंक्य देव म्हणाला.

पुढे तो म्हणतो, "लक्ष्या आणि अशोक सराफ यांचा धुमधडाका हा सिनेमा आला आणि त्यानंतर मग सगळं चित्रचं पालटलं. कारण, मराठीत मग सगळी कॉमेडीची लाट आली. आणि, त्यामुळे मग मला कुठे तरी साईड ट्रॅक झाल्यासारखं झालं."

दरम्यान, अजिंक्य देव याने त्याच्या कारकिर्दीत अनेक गाजलेले सिनेमा मराठी इंडस्ट्रीला दिले. बाळा जो जो रे, सौ. शशी देवधर, माहेरची साडी, सर्जा, कशासाठी प्रेमासाठी असे कितीतरी गाजलेल्या सिनेमात तो झळकला आहे.