प्रिया कशी झाली वजनदार ?

 बेनझीर जमादार

प्रेक्षकांची लाडकी अभिनेत्री प्रिया बापट ही सध्या खूप चर्चेत आहे. तिने वाढविलेल्या वजनामुळे ती सध्या सोशल मीडियावर देखील हिट झाली आहे. त्यामुळे प्रत्येकजण तिच्या वजनदार चित्रपटातील या मेहनतीचे कौतूक करताना दिसते आहे. पण वजनदार बनलेल्या प्रि़याचा अनुभव कसा होता. याविषयी लोकमत सीएनएक्सशी प्रियाशी साधलेला खास संवाद

 

१. तुझ्या वजनदार भूमिकेविषयी काय सांगशील?

- वजनदार या चित्रपटासाठी मी ६७ किलो वजन दीड महिन्यात वाढविले आहे. या वाढलेल्या वजनाला घेऊन सुरुवातीला माझी चीडचीड व्हायची. मला स्वत:ला मीच आवडत नव्हते. पण या चित्रपटातील पूजा या भूमिकेची ती गरज होती. म्हणून एक अभिनेत्री म्हणून मी हे चॅलेज घेऊन वजन वाढविले आहे. त्यानंतर अशी जाणीव देखील झाली की, आपण जसे आहोत तसेच छान आहेत. स्त्री या सगळयांच्या मागे धावताना स्वत: कडे लक्ष द्यायचे विसरुन जातात. या गोष्टीचा सर्वाधिक अनुभव मी यादरम्यान घेतला. त्यामुळे स्त्रियांनी सर्वात आधी स्वत:कडे लक्ष देणे अधिक महत्वाचे आहे. 

 

२. असं म्हणतात की, टॉपच्या दोन अभिनेत्री कधी चांगल्या मैत्री बनू शकत नाही याबद्दल यावर तुझे म्हणणे काय आहे? 

- खरे तर आम्ही दोघींच्याही चित्रपटसृष्टीतील प्रवासाला एकत्र सुरुवात झाली आहे.  पण कामाच्या बाबतीत माझ्यापेक्षा सईला जास्त अनुभव आहे. 2013 मध्ये आलेल्या टाइमप्लीज या चित्रपटात आमच्या दोघींचा एकत्र एक सीन होता. तेव्हापासून मी आणि सई एकमेकींना ओळखतो. मात्र 3 वर्षापूर्वीचे आमच्यातले नाते आणि आता वजनदार चित्रपटादरम्यान तयार झालेले आमच्यातले नाते यात खूप फरक आहे. सई आणि मी एकमेकींना समजून घेण्यासाठी थोडी स्पेस दिली. त्यामुळे आमचा हा एकत्रित प्रवास खऱ्या अर्थाने आता खूप वजनदार झाला आहे. आमचे नाते आता, घट्ट अधिक झाले आहे. 

 

३. या चित्रपटात अभिनय आणि गाणे अशी दुहेरी जबाबदारी तू संभाळताना दिसते आहेस याबद्दल काय सांगशील ?

- मी याविषयी मला आलेला अनुभव सांगते. कारण गोलू पोलू या गाण्यामध्ये अधिक संवाद आहे. मी एक अभिनेत्री असल्यामुळे हा संवाद साधताना मला चेहऱ्यावर हावभाव येऊ दयायचे नव्हते.  मात्र त्याचवेळी अभिनेत्री असल्यामुळे गाण्यामध्ये संवाद साधण हे माझ्यासाठी तितकसं कठीण देखील नव्हते. म्हणूनच एक अभिनेत्री आणि गायिका या दोन्ही भूमिका एकाच चित्रपटात निभावणे मला सोयीस्कर पडले आहे. 

 

४. झिरो फिगरच्या मानसिकतेविषयी तुझे काय मत आहे ?

- मी एवढेच म्हणेण की, झिरो फिगर बनविण्यासाठी शॉर्टकटचा वापर करू नये. तसेच जाड किवा बारीक होणे महत्वाचे नाही. तर तुमची हेल्थ सर्वात जास्त व्यवस्थित असणे सगळ्यात महत्वाचे आहे. तर दुसरीकडे लग्नानंतर स्त्रियांच्या मनात आपल्या तब्येतीविषयी न्यूनगंड असतो. कधीकधी पतीकडून देखील वजन कमी कर अशी रट लागलेली असते. अशावेळी स्त्रियांनी दिवाळी आणि पाडव्याचे गिफ्ट म्हणून सोने मागू नका तर त्यांच्याकडून जीमचे मेंबरशीप मागा असे मी सुचवेन.