Abhishek Pathak-Shivaleeka Oberoi Wedding : 'दृश्यम 2'चा दिग्दर्शक अभिषेक पाठकने शिवालिकासोबत बांधली लग्नगाठ, पाहा फोटो

Abhishek Pathak-Shivaleeka Oberoi Wedding : सिड व कियाराच्या लग्नानंतर बॉलिवूडचं आणखी एक सेलिब्रिटी कपल लग्नबंधनात अडकलं. काल दोघांनी गोव्यात लग्नगाठ बांधली.

सिद्धार्थ मल्होत्रा व कियारा अडवाणी यांनी गेल्या ७ फेब्रुवारीला लग्नगाठ बांधली. सिड व कियाराच्या लग्नानंतर बॉलिवूडचं आणखी एक सेलिब्रिटी कपल लग्नबंधनात अडकलं. होय, आम्ही बोलतोय 'ते ये साली आशिकी' व 'खुदा हाफिज' यासारख्या चित्रपटांत झळकलेली अभिनेत्री शिवालिका ओबेरॉय व 'दृश्यम 2'चा दिग्दर्शक अभिषेक पाठक (Abhishek Pathak)या दोघांबद्दल. शिवालिका व अभिषेक दीर्घकाळापासून एकमेकांना डेट करत होते. काल दोघांनीही गोव्यात लग्नगाठ बांधली.

 गेल्या 24 सप्टेंबरला शिवालिकाने एक व्हिडीओ पोस्ट करत, निर्माता दिग्दर्शक अभिषेक पाठकसोबतचं आपलं नातं ऑफिशिअल केलं होतं. 24 जुलैला शिवालिकाच्या वाढदिवशी या कपलने साखरपुडा केला होता. काल ९ फेब्रुवारीला दोघांचा शाही विवाहसोहळा पार पडला. या लग्नाचे काही फोटो अभिषेक व शिवालिकाने शेअर केले आहेत. दोघंही नववधू-वराच्या पोशाखात कमालीचे सुंदर दिसत आहेत. या लग्नाला बॉलिवूडच्या अनेक सेलिब्रिटींनी हजेरी लावली. अजय देवगण, कार्तिक आर्यन, नुसरत भरूचा, विद्युत जामवल, सनी सिंह, भूषण कुमार असे सगळे बॉलिवूडचे दिग्गज या लग्नात सहभागी झाले होते.

अशी सुरू झाली होती लव्हस्टोरी...
शिवालिकाने एका चॅट शोमध्ये आपल्या लव्हस्टोरीबद्दल सांगितलं होतं. ती म्हणाली होती, मी खुदा हाफिज या चित्रपटासाठी ऑडिशन दिलं होतं. अभिषेकला भेटण्याआधी मी त्याचे वडील कुमार मंगत पाठक यांना भेटले होतं. नंतर अभिषेकशी भेट झाली. आमचे खूप कॉमन फ्रेन्ड असल्याचं आम्हाला कळलं. हळूहळू आमच्या भेटीगाठी वाढत गेल्या आणि यानंतर आम्ही कधी प्रेमात पडलो ते कळलंच नाही. अभिषेकने तुर्कस्थानमध्ये शिवालिकाला प्रपोज केलं होतं.
शिवालिकाने ग्रॅज्युएशन पूर्ण केल्यानंतर 2014 साली आपलं फिल्मी करिअर सुरू केलं. किक या चित्रपटासाठी तिने असिस्टंट डायरेक्टर म्हणून काम केलं होतं. 2019 मध्ये तिला ये साली आशिकी या चित्रपटात पहिला ब्रेक मिळाला. खुदा हाफिजमध्ये ती लीड रोलमध्ये झळकली. अभिषक पाठक याने 'दृश्यम 2' दिग्दर्शित केला. या सिनेमाने बॉक्स ऑफिसवर 250 कोटींपेक्षा अधिक कमाई केली.