अनेक वर्षानंतर प्रियंका चोप्राने सांगितले बॉलिवूडचं धक्कादायक वास्तव, या कारणामुळे ती वळली हॉलिवूडकडे

Priyanka Chopra : बॉलिवूड सोडून हॉलिवूडमध्ये जाण्याचा प्रियंका चोप्राच्या अचानक निर्णयाने सर्वांनाच धक्का बसला होता. पण बऱ्याच वर्षांनंतर प्रियांकाने यामागचे खरे कारण उघड केले आहे.

बॉलिवूडचे एक कटू सत्य हे आहे की गॉडफादर नसेल तर तिथे पाय रोवणे खूप कठीण आहे. जरी तुम्ही थोडाफार जम बसवला तरी काही वेळा चांगले प्रकल्प मिळणे अशक्य वाटते. या कटू सत्याबाबत अनेकांनी वेळोवेळी विधानेही केली. पण अलीकडेच बॉलिवूडची देसी गर्ल प्रियांका चोप्रा(Priyanka Chopra)ने अचानक बॉलिवूड सोडून हॉलिवूडचा मार्ग पत्करण्याच्या निर्णयावर आपले मौन सोडले आहे. प्रियांकाने हे करण्यामागे जे सत्य सांगितले ते जाणून तुम्हाला धक्का बसेल.

प्रियंका चोप्रा म्हणाली की, 'एक वेळ अशी आली होती की मी बॉलिवूड सोडण्याच्या मूडमध्ये होते आणि काहीतरी मार्ग शोधत होते. मला इंडस्ट्रीत एका कोपऱ्यात ढकलले जात होते. लोक कास्ट करत नव्हते. लोकांच्या तक्रारी होत्या. हे घडत होते कारण मी राजकारण करण्यात माहिर नाही. मला राजकारणाचा कंटाळा आला होता आणि मला विश्रांतीची गरज होती.

प्रियंका चोप्रा पुढे म्हणाली, 'देसी हिट्सच्या अंजली आचार्य यांनी मला फोन केला. त्यांनी मला एका म्युझिक व्हिडिओमध्ये पाहिले. त्यावेळी मी 'सात खून माफ'चे शूटिंग करत होते. अंजली यांनी विचारले की तुला अमेरिकेत म्युझिक इंडस्ट्रीत करिअर करण्यात रस आहे का. या म्युझिकने मला जगाच्या इतर भागांना भेट देण्याची संधी दिली. मला काही चित्रपट करायचे होते. पण त्यासाठी मला काही लोकांना आकर्षित करावे लागेल. मी बराच काळ काम केले. पण मला ते करायचे होते असे नाही. म्हणूनच जेव्हा ही ऑफर आली तेव्हा मी होकार दिला आणि अमेरिकेला आले.

प्रियंकाने अनेक वर्षे हॉलिवूडमध्ये संगीत क्षेत्रात आपली कारकीर्द प्रस्थापित करण्याचा प्रयत्न केला. पण प्रियांकाला जाणवलं की ती अभिनयात चांगली आहे. यानंतर प्रियांकाने खूप मेहनत करून 'क्वांटिको' मिळवला. या मालिकेने प्रियांका हॉलिवूडमध्ये प्रसिद्ध झाली. तेव्हापासून, अभिनेत्री एका किंवा दुसऱ्या प्रोजेक्टमध्ये व्यस्त आहे. 'सिटाडेल' व्यतिरिक्त प्रियांका लवकरच 'लव्ह अगेन'मध्येही दिसणार आहे.