अरिजीत सिंहला पश्चिम बंगालमध्ये भेटायला पोहोचला आमिर खान, छतावर उडवला पतंग

अरिजीत सिंहच्या निवृत्तीनंतर 'मिस्टर परफेक्शनिस्ट'ने घेतली भेट; काय आहे नेमकं कारण?

बॉलिवूडचा 'मिस्टर परफेक्शनिस्ट' आमिर खान सध्या त्याच्या एका खास भेटीमुळे चर्चेत आला आहे. प्रसिद्ध गायक अरिजीत सिंह याने अवघ्या आठवड्यापूर्वीच पार्श्वगायनातून निवृत्ती घेण्याची घोषणा करून चाहत्यांना धक्का दिला होता. अशातच आमिर खान थेट अरिजीतच्या पश्चिम बंगालमधील मुर्शिदाबादमधील जियागंज येथील घरी पोहचला. 

अरिजीत सिंह हा आपल्या साध्या राहणीमानासाठी ओळखला जातो. आमिरने त्याच्या घरी जाऊन केवळ भेटच घेतली नाही, तर त्याच्यासोबत घराच्या छतावर पतंग उडवण्याचा आनंदही लुटला. सोशल मीडियावर व्हायरल झालेल्या व्हिडीओंमध्ये आमिर खान पतंग उडवताना पाहायला मिळतोय. या दोन दिग्गजांना एकत्र पाहण्यासाठी जियागंजमध्ये चाहत्यांची मोठी गर्दी जमली होती.

#AamirKhan at #ArijitSingh's house in West Bengal. Seems like they are shooting something pic.twitter.com/ac9hLBe8DW

— $@M (@SAMTHEBESTEST_) February 3, 2026

अधिकृतपणे या भेटीचे कारण अद्याप स्पष्ट झालेले नाही. सोशल मीडियावर सध्या अशी चर्चा रंगली आहे की, आमिर खानने अरिजीत च्या निवृत्तीच्या निर्णयावर फेरविचार करण्यासाठी आणि त्याचे मन वळवण्यासाठीच ही खास भेट घेतली असावी. तर काही रिपोर्ट्सनुसार, अरिजीत आमिरच्या एका नवीन चित्रपटासाठी संगीत तयार करत आहे. 

आमिर-अरिजीतची सुपरहिट जोडी
अरिजीत सिंहने आमिर खानच्या अनेक चित्रपटांसाठी गाणी गायली आहेत, जी आजही प्रेक्षकांच्या ओठावर आहेत. ज्यात 'दंगल' चित्रपटातील 'नैना', 'लाल सिंग चड्ढा'मधील 'तेरे हवाले' आणि 'फिर ना ऐसी रात आयेगी' या गाण्यांचा समावेश आहे.