पाकिस्तान सुपर लीग २०२६ च्या अटीतटीच्या अंतिम सामन्यात बाबर आझमच्या पेशावर झल्मीने हैदराबाद किंग्समेनचा पराभव करत विजेतेपदावर नाव कोरले आहे. बाबर आझमच्या नेतृत्वाखाली पेशावरने पहिल्यांदाच हा किताब जिंकला असून, बाबरच्या कारकिर्दीतील ही तिसरी ट्रॉफी ठरली आहे. मात्र, विजयानंतर ट्रॉफी स्वीकारताना बाबरने भारताचा स्टार फलंदाज रोहित शर्माची आयकॉनिक सेलिब्रेशनची नक्कल केली. मात्र, त्यानंतर नेटकऱ्यांनी त्यांना चांगलेच ट्रोल केले.
विजेतेपदाचा आनंद साजरा करण्यासाठी बाबर आझम जेव्हा स्टेजवर ट्रॉफी घेण्यासाठी जात होता, तेव्हा त्याने भारतीय कर्णधार रोहित शर्माच्या २०२४ च्या टी-२० वर्ल्ड कपमधील आयकॉनिक सेलिब्रेशनची नक्कल करण्याचा प्रयत्न केला. मात्र, नेटकऱ्यांच्या मते बाबरला ही स्टाईल नीट जमली नाही. हा व्हिडिओ व्हायरल होताच नेटकऱ्यांनी कॉपी कॅट म्हणत त्याला सोशल मीडियावर ट्रोल करण्यास सुरुवात केली आहे.
अंतिम सामन्यात हैदराबाद किंग्समेनचा संघ पूर्णपणे ढेपाळलेला पाहायला मिळाला. प्रथम फलंदाजी करताना हैदराबादचा संघ १८ षटकांत अवघ्या १२९ धावांत गारद झाला. पेशावर झल्मीने १३० धावांचे हे माफक लक्ष्य १५.२ षटकांत ५ विकेट्स राखून सहज पूर्ण केले. या विजयाचा खरा नायक ॲरॉन हार्डी ठरला. त्याने गोलंदाजीत ४ विकेट्स घेतले आणि फलंदाजी करताना नाबाद ५६ धावांची मॅचविनिंग खेळी खेळली.
विजेतेपद मिळाले असले तरी, फलंदाज म्हणून बाबर आझमसाठी अंतिम सामना अत्यंत वाईट ठरला. तो सामन्याच्या पहिल्याच चेंडूवर गोल्डन डक झाला. त्यामुळे बाबरची एका मोठ्या विक्रमाची संधी थोडक्यात हुकली. एकाच हंगामात सर्वाधिक धावा करण्याचा विक्रम मोडण्यासाठी त्याला केवळ २ धावांची गरज होती. या हंगामात त्याने ५८८ धावा केल्या. २०२२ मध्ये फखर जमाननेही ५८८ धावा केल्या होत्या. जर बाबरने केवळ १ धाव काढली असती तर तो ऐतिहासिक विक्रम त्याच्या नावावर झाला असता.
