Success Story: लहानपणी घरोघरी पेपर टाकले, अनाथाश्रमात वाढला; अखेर मेहनतीच्या जोरावर IAS पदी वर्णी
By ऑनलाइन लोकमत | Published: May 10, 2024 11:06 AM2024-05-10T11:06:03+5:302024-05-10T11:09:17+5:30
ही कथा आहे IAS अधिकारी अब्दुल बी नासर यांची, ज्यांनी केरळमधील अनाथाश्रमात १३ वर्षे शिक्षण घेतले.....
Success Story: लहानपणी घरोघरी पेपर टाकले, अनाथाश्रमात वाढला; अखेर मेहनतीच्या जोरावर IAS पदी वर्णी
UPSC Success Story: देशातील सर्वात अवघड मानली जाणारी यूपीएससीची परीक्षा उत्तीर्ण करून आयएएस होण्यासाठीचा अनेकांचा संघर्ष तुम्ही वाचला, ऐकला किंवा पाहिला असेल. अशा संघर्षामुळे आपल्यालाही एक प्रकारची उर्जा मिळते आणि काहीतरी करून दाखवण्याची उर्मी जागी होती. आज आपण अशाच एका व्यक्तीच्या आयुष्यातील खडतर प्रवासानंतर मिळालेल्या यशाची माहिती जाणून घेणार आहोत. या व्यक्तीचा संघर्ष वाचला तर आपसुकपणे तुम्ही त्याचे भरभरून कौतुक कराल. ही कथा आहे IAS अधिकारी अब्दुल बी नासर यांची, ज्यांनी केरळमधील अनाथाश्रमात १३ वर्षे शिक्षण घेतले.
अब्दुल बी नासर यांच्या लहानपणीच वडिलांचे छत्र हरविल्याने त्यांच्या कुटुंबाचे जगणे खूप कठीण झाले होते. त्यावेळी त्यांना लहानपणापासून काम करण्याची सवय करावी लागली. ते आणि त्याची भावंडे अनाथाश्रमात असताना त्यांची आई घरगुती मदतनीस म्हणून काम करत होती. नासर यांनी १३ वर्षे अनाथाश्रमात राहून शालेय शिक्षण पूर्ण केले.
वयाच्या १० व्या वर्षी हॉटेलमध्ये काम-
अब्दुल नासर यांनी वयाच्या अवघ्या १० व्या वर्षी हॉटेलमध्ये वेटर म्हणूनही काम केले. शालेय शिक्षण घेत असताना अनेकदा त्यांनी अनाथाश्रमातून पळून काढला होता. पण नंतर माघारी येत त्यांनी त्यांचा अभ्यास पूर्ण केला. अत्यंत गरिबी असूनही नासर यांनी कशीबशी बारावी पूर्ण केली. त्यानंतर थालास्सेरी येथील शासकीय महाविद्यालयातून पदवी प्राप्त केली. खडतर काळात नासर यांनी मुलांची शिकवणी घेतली तसेच फोन ऑपरेटर म्हणून काम केले. त्याचबरोबर सकाळी पेपर टाकण्याचेही त्यांनी काम केले.
पहिली नोकरी १९९४ मध्ये-
पदव्युत्तर शिक्षणानंतर अब्दुल नासर यांना केरळच्या आरोग्य विभागात अधिकारी म्हणून पहिली नोकरी मिळाली. पण ते या नोकरीवर समाधानी नव्हते. २००६ मध्ये राज्य नागरी सेवा परीक्षा उत्तीर्ण झाल्यानंतर ते उपजिल्हाधिकारी झाले. त्यानंतर २०१५ मध्ये त्यांना केरळचे सर्वोत्कृष्ट उपजिल्हाधिकारी म्हणून सन्मानित करण्यात आले.
२०१७ मध्ये आयएएस अधिकारी -
अब्दुल नासर यांना २०१७ मध्ये आयएएस अधिकारी म्हणून बढती देण्यात आली होती. २०१९ मध्ये ते कोल्लम जिल्ह्याचे जिल्हाधिकारी बनले. मात्र, याआधी त्यांनी सरकारमध्ये गृहनिर्माण आयुक्त म्हणूनही काम केले आहे. अशाप्रकारे अब्दुल नासर यांनी आपल्या मेहनतीच्या जोरावर अनाथाश्रमापासून आयएएसपर्यंतचा प्रवास केला आहे.