उरण विधानसभा मतदारसंघात अखेर परिवर्तनाची लाट

अटीतटीचा सामना; तिरंगी लढतीत महेश बालदी यांची बाजी

- मुधकर ठाकूर 

उरण : महायुतीला आव्हान देणाऱ्या भाजपचे बंडखोर अपक्ष उमेदवार महेश बालदी यांनी अखेर सेनेचे मनोहर भोईर यांना पराभवाची धूळ चारत उरण विधानसभा मतदारसंघात विजयाची पताका फडकावली. अत्यंत चुरशीच्या तिरंगी लढतीकडे तमाम राज्यातील राजकीय पक्षांच्या नेत्यांसह उरणकरांचेही लक्ष लागून राहिले होते. सेनेचे आमदार मनोहर भोईर यांच्या कारभाराला कंटाळून अखेर सूज्ञ मतदारांनीच भोईर यांना पराभवाचा धक्का देऊन मतदारसंघात परिवर्तन घडवले.

भविष्यात देशाची दुसरी आर्थिक राजधानी म्हणून उरण उदयास येत आहे. त्यामुळे या मतदारसंघावर वर्चस्व प्रस्थापित करण्यासाठी सर्वच राजकीय पक्षात जोरदार लढाई सुरू होती. उरणमध्ये तिन्ही उमेदवारांमध्ये निवडणूक जिंकण्यासाठी घमासान सुरू होते. परस्परांविरोधात दररोजच्या प्रचारात आरोप-प्रत्यारोपांच्या फैरी झाडल्या जात होत्या. जातीपातीच्या हीन प्रचारामुळे प्रचाराची पातळी अत्यंत खालावली होती. ‘मते मागतो आहे, मुलगी नव्हे’ या बालदी यांच्या वक्तव्यांविरोधात तर शेकाप, सेनेने रान उठविले होते.

जनता, कार्यकर्त्यांना वेळ न देऊ शकणाºया आणि कार्यकर्त्यांची कदर नसलेल्या व जनतेच्या विकासकामांऐवजी ठेकेदारीच्या कामातच अधिक रस दाखविणाºया भोईर यांच्याविरोधात काही नाराज शिवसैनिकच उभे ठाकले होते. पाच वर्षांच्या आमदारकीच्या काळात त्यांनी हितचिंतकांना जवळ केले होते, तर प्रामाणिक कार्यकर्त्यांना त्यांनी दूर केले. मतदारसंघात फारशी लोकोपयोगी कामे केली नसल्याने अखेर प्रचारासाठी शिवसेना पक्षप्रमुख उद्धव ठाकरे यांना पाचारण करण्याची पाळी आली होती. मात्र, उद्धव ठाकरे यांची प्रचारसभाही भोईर यांना पराभवापासून वाचवू शकली नाही.

तीच स्थिती शेकाप उमेदवार विवेक पाटील यांची झाली आहे. २०१४ च्या पराभवानंतर अनेक निष्ठावंत, प्रामाणिक कार्यकर्ते दुरावले गेले आहेत. त्यांना पुन्हा पक्षात आणता आले नाही. प्रचारादरम्यान अनेक काँग्रेस-राष्ट्रवादीचे पदाधिकारी, कार्यकर्ते महाआघाडीचा धर्म विसरून विरोधकांना मदत करताना दिसत होते. प्रचारातही ताळमेळ लागत नव्हता. अखेर मतदारांनी विवेक पाटील यांच्याविरोधातील नाराजी मतपेटीद्वारे व्यक्त केल्याचे दिसून येत आहे.

स्वबळावर घुमवला शिटीचा आवाज

भाजपचे बंडखोर अपक्ष उमेदवार महेश बालदी यांनी उरण मतदारसंघात केंद्र, राज्य शासनाच्या माध्यमातून केलेल्या विकासकामांचा लेखाजोखा मतदारांपर्यंत पोहोचविण्यात यशस्वी ठरले. पक्षातून निष्कासित करण्यात आले असले तरी त्यांनी प्रचारपत्रके, फ्लेक्सवर भाजप नेत्यांचे फोटो लावले. यासाठी भाजप नेत्यांचा त्यांना छुपा पाठिंबा मिळत होता. त्याशिवाय जाहीर सभा, कॉर्नर सभांचे शिस्तबद्ध नियोजन आणि तरुण कार्यकर्त्यांची फौज यांच्या भरघोस पाठिंब्यावर महेश बालदी यांनी अखेर बाजी मारली. विशेष म्हणजे, कोणताही नेता हाताशी नसतानाही त्यांनी स्वबळावर उरणमध्ये शिटीचा आवाज घुमवला आहे.