४० प्रवाशांनी भरलेली बस मध्यरात्री पलटली; अपघातानंतर बस आगीत जळून खाक

मध्यरात्री गाडी चालवताना चालकाचा डोळा लागला, तेव्हा चालकाचे बसवरील नियंत्रण सुटल्याने बसला अपघात झाला.

हैदराबाद - तेलंगणाच्या जोगुलंबा गडवाल जिल्ह्यात एका खासगी बसचा अपघात होऊन बसला भीषण आग लागल्याची घटना घडली. या दुर्घटनेत बसमधील एक महिला प्रवाशाचा जळून मृत्यू झाला. तर, एका प्रवाशाला किरकोळ दुखापत झाली आहे. शनिवारी सकाळी ३ वाजता हैदराबादहून चित्तूरकडे जाणाऱ्या जगन अमेजॅन ट्रॅव्हल्सच्या बससोबत ही दुर्घटना घडली. स्थानिकांसह पोलिसांनी घटनास्थळी धाव घेऊन बसमधील प्रवाशांना धीर देण्याचा प्रयत्न केला. 

मध्यरात्री गाडी चालवताना चालकाचा डोळा लागला, तेव्हा चालकाचे बसवरील नियंत्रण सुटल्याने बसला अपघात झाला. या बसमधून ४० प्रवासी प्रवास करत होते. अपघात झाल्यानंतर बस रस्त्याच्या कडेला जाऊन पलटी झाली. त्यामुळे, बसला आग लागली. अपघातानंतर प्रवाशांनी तात्काळ बसमधून बाहेर पडण्याचा प्रयत्न केला. सर्व प्रवासी बसमधून बाहेर आले. मात्र, एका महिला प्रवाशाचा हात अडकल्याने तिला बसमधून बाहेर येता आले नाही. त्यानंतर, बसने मोठा पेट घेतल्याने या महिलेचा जळून मृत्यू झाला. 

दरम्यान, पोलिसांनी अपघाताची माहिती मिळताच घटनास्थळी धाव घेतली. अपघातातील मृत महिलेची ओळख पटविण्याचे काम सुरू असून पोलिसांकडून पुढील तपास सुरू आहे. पोलिसांनी अग्निशमक दलाच्या गाडीने बसला लागलेली आग आटोक्यात आणली. मात्र, या दुर्घटनेत बस जळून खाक झाली.