Kolhapur Municipal Election Results 2026: कोल्हापुरात काँग्रेसच स'तेज'; 'या' तीन प्रभागात 'पंजा'ची छाप, कुठं फुललं कमळ, धनुष्यबाणाच काय...वाचा

कोणत्या प्रभागात निवडून आले पॅनेल टू पॅनेल...

कोल्हापूर : कोल्हापूर महापालिकेत महायुतीतील तीन पक्ष एकत्र लढले असताना देखील काँग्रेसचे नेते सतेज पाटील यांनी एकट्याने शड्डू ठोकून महायुतीला चांगलाच घाम सोडला. काँग्रेसने सर्वाधिक ३७ जागा जिंकून आपले वर्चस्व दाखवून दिले. भाजपला २४ जागा जिंकत्या आल्या. तर शिंदेसेनेने १४, राष्ट्रवादी अजित पवार गटाने ४, उद्धवसेनेने १ तर जनसुराज्य पक्षाने एका जागेवर विजय मिळवला आहे. काँग्रेसने तीन प्रभागात विरोधकांचा धुव्वा उडवत पॅनेलच्या पॅनेल निवडून आणले आहे. तर भाजप अन् शिंदेसेनेचे एका-एका प्रभागात सर्व उमेदवार निवडून आले आहेत. 

कोल्हापूर महानगरपालिकेच्या ८१ जागांसाठी गुरुवारी चुरशीने ६६.५४ टक्के मतदान झाले होते. ३२७ उमेदवार निवडणूक रिंगणात उतरले होते. अनेक प्रभागात अतीतटीच्या लढती झाल्या. आज, सकाळी मतमोजणीला सुरुवात झाल्यापासून उमेदवारांसह शहरवासियांमध्ये धाकधूक लागून राहिली होती. मात्र निकाल हाती यायला सुरुवात होताच भाजपने आघाडी घेतली. मात्र काही तासातच काँग्रेसने आघाडी घेत जोरदार मुसंडी मारली. प्रभाग क्रमांक १, ४ आणि १७ मध्ये विरोधकांचा सुपडासाफ करत सर्वच्या सर्व उमेदवार निवडून आले. तर भाजपचे प्रभाग क्रमांक ३ आणि शिंदेसेनेचे प्रभाग क्रमांक २ मध्ये पॅनेल टू पॅनेल सर्व उमेदवार विजयी झाले. 

या प्रभागात निवडून आले पॅनेल टू पॅनेल

काँग्रेसचे विजयी उमेदवार

प्रभाग क्र.१ -  सुभाष राजाराम बुचडे, पुष्पा नीलेश नरुटे, रूपाली अजित पोवार, सचिन हरीष चौगुले
प्रभाग क्र.४ - स्वाती सचिन कांबळे, विशाल शिवाजी चव्हाण, दीपाली राजेश घाटगे, राजेश भरत लाटकर
प्रभाग क्र.१७ - अर्चना बिरांजे, सचिन शेंडे, शुभांगी पाटील, प्रवीण केसरकर

उर्वरीत प्रभागात काँग्रेसचे एक, दोन उमेदवार निवडून आले. तर प्रभाग क्रमांक २, ३, ७, ९, १० मध्ये एकूण पाच प्रभागात काँग्रेसचा सपाटून पराभव झाला.

भाजपचे विजयी उमेदवार

प्रभाग क्र. ३ - प्रमोद भगवान देसाई, वंदना विश्वजित मोहिते, राजनंदा महेश महाडिक, विजेंद्र विश्वास माने

प्रभाग क्रमांक १, २, ४, ८, १२, १७ मध्ये असे एकूण ६ ठिकाणी भाजपचे कमळ फुलले नाही. बाकी उर्वरीत प्रभागात भाजपचे उमेदवार निवडून आले आहेत.

शिंदेसेनेचे विजयी उमेदवार

प्रभाग क्र.२ - वैभव दिलीप माने, अर्चना उमेश पागर, प्राजक्ता अभिषेक जाधव, स्वरूप सुनील कदम

शहरात शिंदेसेनेचे आमदार राजेश क्षीरसागर असताना देखील १० प्रभागात धनुष्यबाणाचा नेमच लागला नाही.