रश्मिका मंदान्नाचा 'द गर्लफ्रेंड' येतोय OTT वर! कधी आणि कुठे पाहाल?

रश्मिका मंदान्नाचा 'द गर्लफ्रेंड' हा चित्रपट प्रेक्षकांना घरबसल्या पाहता येणार आहे.

The Girlfriend Ott Release: दक्षिण आणि हिंदी चित्रपटसृष्टीत वर्चस्व गाजवणारी अभिनेत्री म्हणून रश्मिका मंदान्ना हिचे नाव आघाडीवर आहे. तिच्या सलग हिट चित्रपटांमुळे ती सध्या करिअरच्या शिखरावर आहे. अलीकडेच रश्मिका मंदान्नाचा "द गर्लफ्रेंड" हा चित्रपट थिएटरमध्ये प्रदर्शित झाला.  आता निर्मात्यांनी या रोमँटिक ड्रामाच्या ओटीटी रिलीजची घोषणा केली आहे. तर हा चित्रपट तुम्ही घरी बसून कधी आणि कुठे पाहू शकता, हे जाणून घेऊया.

बहुतेक चित्रपट थिएटरमध्ये प्रदर्शित झाल्यानंतर ४५ ते ६० दिवसांच्या आत ओटीटीवर येतात. मात्र, 'द गर्लफ्रेंड'च्या बाबतीत हा कालावधी थोडा अधिक आहे. नेटफ्लिक्सने आज रविवारी 'द गर्लफ्रेंड'च्या ओटीटी रिलीजची अधिकृत घोषणा केली आहे.  हा चित्रपट ५ डिसेंबर रोजी नेटफ्लिक्सवर प्रदर्शित होईल. रश्मिका मंदान्नाचा हा चित्रपट तुम्ही हिंदी, तमिळ, तेलुगू, मल्याळम आणि कन्नड या पाच भाषांमध्ये सहजपणे पाहू शकता.

बॉक्स ऑफिसवर ठरला फ्लॉप
'द गर्लफ्रेंड' या चित्रपटाला समीक्षकांकडून चांगली प्रशंसा मिळाली असली तरी, व्यावसायिक स्तरावर तो फारसा प्रभावी ठरला नाही. मीडिया रिपोर्ट्सनुसार, 'द गर्लफ्रेंड'चे बजेट ४० कोटींपेक्षा जास्त असतानाही जगभरात केवळ २७ कोटींची कमाई झाली, ज्यामुळे हा चित्रपट बॉक्स ऑफिसवर फ्लॉप ठरला.  राहुल रवींद्रन दिग्दर्शित हा तेलुगू भाषेतील रोमँटिक ड्रामा चित्रपट आहे. रश्मिका मंदान्नासोबतच, दक्षिण भारतीय अभिनेता दीक्षित शेट्टी आणि अभिनेत्री अनु इमॅन्युएल यांच्या या चित्रपटात महत्त्वाच्या भूमिका आहेत. जर तुम्ही थिएटरमध्ये 'द गर्लफ्रेंड' पाहिला नसेल, तर आता ५ डिसेंबरपासून तुम्ही ओटीटी प्लॅटफॉर्म नेटफ्लिक्सवर घरबसल्या त्याचा आनंद घेऊ शकता.